Los salarios cayeron n’Asturies una media del 1’4% nel caberu trimestre, allonxándose más, per baxo, de la media estatal y marcándose más les fiendes salariales por sector y de xéneru
A la contra de la tendencia teóricamente correcha, ello ye, que los salarios suban al ritmu de los precios, n’Asturies ocurre lo contrario. Non solo va décades que los sueldos suben menos que l’IPC, sino que nel caberu trimestre detéctase una cayida de los ingresos de los y les trabayaores compaxinao con un fuerte incrementu de los precios, especialmente de la vivienda.
La mayor cayía salarial ye la recoyía pol sector de la construcción, con un amenorgamientu del salariu d’un 9’1%.
Medren per otru lláu les fiendes salariales con más de 600 euros al mes de distancia pente la media de los sectores meyor (industria) y pior (hostelería) pagaos y cerca 700 euros de diferencia pente lo que ganen homes y muyeres.
Al mesmu tiempu, l’incrementu del preciu de la vivienda ye del 13’5%, en xeneral, del 13’9% si falamos de la vivienda de segunda man, la más asequible pa la clas trabayadora. Al mesmu tiempu, la cesta la compra xube un 3% ya’l coste de la enerxía un 7%, incrementos que son acumulativos a les fuertes xubíes de los años anteriores.
El resultáu final ye una bultable perda de capacidá alquisitiva y per ende del nivel de vida de les y los asturianos, que, al mesmu tiempu, ven medrar toles fiendes, siendo ca vegada mayor la diferencia col restu l’estáu, pente meyor y peor pagaos y pente homes y muyeres.
Llucía F. Marqués
This work is licensed under a Creative Commons Attribution 4.0 International License.
