“Ser asturianos ye un arguyu, ensin dulda, pero tamién ye una responsabilidá y un compromisu: el de lluchar por esti país, pol so pueblu y porque tenga un bon futuru”, declaró Llucía Fernández na so intervención al pie del monumentu a Belarmino Tomás na Felguera.

Decenes de persones aconceyaron n’esta llocalidá l’8 de setiembre, Día de la Nación Asturiana, na plaza dedicada al presidente del Conseyu Soberanu, como símbolu de la necesidá d’autogobiernu del pueblu asturianu. Tres la ufrienda floral, Fernández fixo un discursu cargáu de conteníu políticu onde señaló a la dependencia de los partíos estatales como principal causa de la situación de desaniciu y probitú que vive’l país.

“Mientres sigamos esperando que partíos con intereses fuera d’Asturies, pa los que’l nuesu país nun significa nada o, a lo más, un estorbu, nun meyorará la nuesa situación. Tenemos de poner la nuesa confianza en nós mesmos, los asturianos, y en quien lleva décades faciendo d’Asturies la so prioridá”, aseguró.

La vocera quixo tamién emponderar la impresionante rempuesta del pueblu asturianu nes protestes contra la participación del equipu israelín na Vuelta Ciclista, recalcando que, seique nos caberos tiempos nun s’alcuentre na primer llinia de llucha, el pueblu asturianu amuesa fuercia y dignidá cuando s’alza contra la inxusticia.

Nesi sen, Fernández concluyó que’l verdaderu desafíu ta en facer llegar un mensaxe de confianza a la xente asturiana, pa que crea en sigo mesma y na necesidá d’axuntar voluntades pa lluchar pol futuru’l país.

Nel Dos Santos

This work is licensed under a Creative Commons Attribution 4.0 International License.