Ganaderos donen forraxes pa paliar la falta de pación depués de los fueos al traviés del sindicatu Unión Rural Asturiana
Les llacerioses consecuencies de los fueos forestales d’estos caberos díes siguen sintiéndose con especial crudeza nel sector agroganaeru asturianu. Una de les más urxentes ye la perda de zones de pación, que dexa a munches esplotaciones ensin terrenes onde llevar el ganao.
Ante esta situación, la Unión Rural Asturiana (URA) punxo en marcha una recoyida solidaria d’alimentu, pa que los ganaderos que se vieron afeutaos puedan siguir alimentando al so ganao ensin esperar pola tramitación —llarga y entá indefinida— de les ayudes oficiales.
La iniciativa ta siendo posible gracies a la donación de rollos d’herba d’otros ganaderos y al sofitu de tresportistes, que s’encarguen de treslladar el forrax hasta les zones más afeutaes.
Dende URA señalen que’l problema ye d’urxencia y que nun pue resolvese namás con anuncios de futuries subvenciones. Mentanto, el Gobiernu d’Asturies nun concretó entá qué midíes inmediates va aplicar pa dar respuesta a esta emerxencia, llendándose a señalar que “va haber ayudes” ensin detalles sobre cuantía nin plazos.
Entantu, nel campu afítase aquello de que “el pueblu salva al pueblu”, con soluciones colectives qu’intenten tapar el vacíu d’una respuesta institucional llento.
Llucía F. Marqués
This work is licensed under a Creative Commons Attribution 4.0 International License.
