La FIDMA cellebró’l IV Día de la Llingua Asturiana con un programa ampliu d’actividaes, destacando la presentación d’Epa, Empreses y Profesionales pol Asturianu
La Feria Internacional de Muestres d’Asturies (FIDMA) acoyó esta fin de selmana la cuarta edición del Día de la Llingua Asturiana, una xornada que se consolidó dientro de la programación del recintu ferial y que s’articula gracies al llabor organizativo d’Iniciativa pol Asturianu. La cita cuenta col arropu del Gobiernu del Principáu y de conceyos como Xixón, Avilés o Mieres.
L’actu d’apertura tuvo llugar na entrada del Recintu Ferial Luis Adaro, xunto al bustu de Gaspar Melchor de Xovellanos. Xuan Pandiella, representante d’Iniciativa pol Asturianu, exerció de conductor d’una ceremonia que principió cola gaita de Lidia Muñiz. Dempués, Álvaro Alonso Ordás, secretariu xeneral de la Cámara de Comerciu de Xixón y direutor de la FIDMA, destacó -falando n’español- que l’asturianu «ye parte esencial de la tradición asturiana y vehículu de conocimientu, cultura y rellaciones afeutives a lo llargo de los sieglos».
La intervención d’Arantza Margolles recordó les pallabres d’Apolinar Rato en 1885 sobre’l peligru de desapaición del idioma, pero tamién apuntó a los avances nos últimos años, con empreses como McDonald’s, Ikea o Decathlon usando l’asturianu nos sos productos y campañes. Al mesmu tiempu, señaló la falta de presencia del idioma en dellos estands institucionales de la FIDMA y criticó’l «maltratu políticu» históricu. «Namás la oficialidá pue garantizar un marcu llegal que protexa la llingua», afirmó.
El momentu más esperáu foi’l pregón, a cargu de la periodista Inés Paz, conductora de La radio es mía en RPA. Nel so discursu reconoció la so falta de contautu cola llingua na infancia y cómo, tres de vivir 15 años fuera d’Asturies, entamó a enviciar la normalidá llingüística de pueblos como’l catalán, el gallegu o’l vascu. «De vuelta a casa, va trés años, toi pudiendo namorame de la de mio», confesó. Ya en clave asturiana, sorayó que «la llingua asturiana nun dixebra, xúnenos como pueblu. Tenemos motivos pa presumir d’ella como presumimos de la sidre».
Tamién participó la conseyera de Cultura, Política Llingüística y Deporte, Ana Vanessa Gutiérrez, que fixo un llamamientu al consensu institucional y reafirmó’l compromisu del Gobiernu col procesu hacia la oficialidá. El himnu d’Asturies y una ufrienda floral a Xovellanos puxeron el ramu al actu institucional.
Un de los actos más relevantes d’esta xornada foi la presentación oficial de EPA, Empreses y Profesionales pol Asturianu, una organización qu’acomuña a decenes d’empreses qu’utilicen l’asturianu como llingua vehicular y que tienen un fondu compromisu llingüísticu. Miembros de la Epa protagonizaron de tardi un perinteresante alderique sobre l’asturianu como motor económicu.
A lo llargo de tol díe cellebráronse actividaes como un homenaxe a Xuan Bello, la visita al puestu d’Iniciativa pol Asturianu, la presentación de campañes llingüístiques d’Avilés, o una visita guiada n’asturianu al estand de Xixón. Pela tarde la programación incluyó la proyección del videu Madrellingua, amuesa de cocina con Panduru, visita al Muséu del Pueblu d’Asturies, conferencia sobre la Danza Prima, firma del llibru El pesu de la nieve de Pablo Rodríguez Medina y l’actividá participativa Alcuentra’l to pueblu.
El Día de la Llingua Asturiana reafitase asina como un espaciu de referencia dientro la FIDMA, con un mensaxe compartíu: l’asturianu sigue vivu y la so defensa necesita compromisu social, institucional y políticu.
Nel Dos Santos
This work is licensed under a Creative Commons Attribution 4.0 International License.
