Tachen el nuevu Plan integrau de residuos pa la economía circular de ser mui poco ambiciosu y decepcionante, “Namás propón siguir amburando basoria en forma de CSR nin aborda’l grave déficit que tenemos n’Asturies con una de les menores tases de reciclaxe del estáu, bien lloñe de los oxetivos europeos de reducción, recuperación y reciclaxe de residuos urbanos”.
El plan, denuncien dende la Coordinadora Ecoloxista d’Asturies, faese d’espales a la realidá ambiental del aire na zona cientral d’Asturies, onde tan allugaes les instalaciones onde’l plan prevé quemar borrafes. Tampocu tien en cuenta que n’Asturies danse los piores datos de reciclau del estau, reciclándose escasamente’l 23% de los residuos urbanos, perlloñe del 50% que desixe Europa.
El plan de residuos PIRECA 2030 nun busca solución a esti problema sinón que continúa sofitando la fabricación de CSR, ello ye, amburar envede reciclar residuos, suponiendo un impactu negativu na calidá del aire y afeutando negativamente na llucha contra’l cambiu climáticu.
Per contra, dende la CEA proponen que’l plan contemple la ellaboración d’un estudiu nel que se analicen los estremaos tipos de modelu de xestión de recoyida selectiva cola fin d’escoyer el más afayaizu en ca casu ne función de les carauterístiques de ca llugar.
Otra cuestión que destaca la Coordinadora ye que nel plan nun se tienen en cuenta les posibilidaes d’emplegu na xestión de residuos. “Una xestión meyor de los residuos xeneraría más emplegu, menos impautu ambiental y menos dependencia an importación de materies primes”.
Susana Sela
This work is licensed under a Creative Commons Attribution 4.0 International License.
