Hereu pasó por Asturies a decimos que “ver la playa Xixón enllena ye la meyor muestra de que les coses van bien n’Asturies”
La visita del ministru d’Industria y Turismu, Jordi Hereu, pa nagurar la Feria Internacional de Muestras d’Asturies (FIDMA) foi un nuevu exemplu del enfotu del gobiernu español de siguir desindustrializando Asturies.
Nel so discursu institucional, ente una riestra de xeneralidaes de rellenu, Hereu aseguró que “ver la playa de Xixón enllena ye la meyor muestra de que les coses van bien n’Asturies“, una frase que causó estupor y malestar ente colleutivos sociales, sindicatos y ciudadanía crítica. Reducir la realidá socioeconómica asturiana a una postal turística ye, como poco, inresponsable.
Mentanto, l’Estáu español continúa coles polítiques de desindustrialización d’Asturies, ensin plan de choque, ensin inversión territorializada y con una mocedá condergada a emigrar. El ministru nun fixo referencia a les plantes en riesgu de cierre, a la falta de polítiques industriales con sentíu territorial, nin a una transición ecolóxica con xusticia social. Lo único que traxo foi presencia institucional y discursos vacíos.
N’Asturies hai sectores enteros afeutaos por una reconversión ensin alternativa: siderurxa, enerxía, naval, minería…. Y el gobiernu central, llueñe d’aportar soluciones, repite esquemes de desentendimientu y de centralismu decisoriu, priorizando intereses empresariales y financieros sobro les necesidaes del país.
El mesmu recintu ferial, enllenu empreses, productores y instituciones qu’intenten tirar p’alantre, sirvió como contrastre con unes palabres oficiales qu’escaecieron les demandes reales d’Asturies. Nin plan de reactivación, nin avances n’autogobiernu, nin defensa de la cultura propia. Too ye xesticulación y promeses vacíes.
Dende distintos ámbetos sociales y culturales, reivindícase un cambéu de modelu: una Asturies con capacidá de decidir sobre’l so futuru económicu, una planificación propia al serviciu del texíu llocal, una soberanía real que nun se mida en chiringuitos, sinón en trabayu, derechos y dignidá.
La playa ta enllena, sí. Pero les fábriques tán vacíes, los pueblos vacíos y la xente moza, forciada a emigar.
This work is licensed under a Creative Commons Attribution 4.0 International License.
