Violencies machistes “Lo que facemos nun ye abondo”

31 Xunetu, 2025

Carme Pérez Antolín lleó’l comunicáu d’Andecha Astur cientrándose nes apavoriantes cifres de violencia contra la muyer n’Asturies “Lo que facemos mes tres mes ye denuncia social pa romper la impunidá de los agresores y pa ser la voz de les víctimes”

Ayeri aconceyáronse delantre la Gota Lleche, en Xixón, al rodiu un centenar de persones pa denunciar, como cada mes, la violencia exercida contra les muyeres. Los convocantes son la Plataforma Stop Violencies, qu’acomuña a les organizaciones Andecha Astur, Anticapitalistes, Amamantar, Asociación de Pensionistes de Xixón, Feminismu en Llucha del CSI, la plataforma del Serviciu d’Ayuda a Domiciliu -SAD-, Podemos y Verdes-Equo y aconceyen cada caberu miércoles del mes pa visibilizar el númberu de muyeres asesinaes por selo no que va d’añu, 49 en concretu, tres d’elles n’Asturies. Carme punxo l’acentu na necesidá de tar sollertes nel nuesu entornu, yá que ta nidio que la ‘proteición’ oficial ye insuficiente ya ineficaz “si queremos cambiar les coses igual tenemos que mirar pa los llaos y ver lo que pasa al rodiu nueso, coles nueses vecines, coles nueses amigues, coles nueses compañeres de trabayu o incluso coles nueses compañeres d’organización”. Les cifres remanaes son ciertamente apavoriantes. 49 asesinaes nel Eestáu, tres n’Asturies Karilenia, de Llangréu, Susana de Xixón, y Mª Dolores, de Llaviana-. Diez denuncies diaries; 847 muyeres acreditaron ser víctimes de violencia machista namás nel primer trimestre d’esti añu. 2.137 asturianes nel sistema VioGeén, de les que 1179 tienen que tener proteición policial, y 270 albídrase que tan en peligru real de ser asesinaes. Pente los agresores, hailos con hasta cinco condergues por agresión a distintes muyeres, demostrando lo seles o inútiles d’eses condergues, qu’avecen cumplise e tercer grau. El Xulgáu de Violencia ta colapsáu, con xuicios fechaos pal 2027, permitiendo casos como’l de Susana, asesinada en Cimavilla mentanto s’esperaba’l xuiciu del so agresor por intentu d’asesinatu d’otra muyer nel 2024. ” La impunidá de los agresores, refuerza que la violencia continúe y fai tovía más vulnerables a les víctimes” destacó Carme, denunciando la complicidá institucional y recalcando lo difícil que ye denunciar, como recomienda la Ministra d’Igualdá como solución, cuando sabes que l’agresor va seguir meses o años llibre a la espera de xuiciu, cuando tienes que repetir con detalle les agresiones, hasta lo más íntimo, una y otra vuelta (en comisaría, nel xulgáu y énte l’equipu psicosocial), cuando sabes que d’entrar na cárcel fadrálo namás pa les nueches, pudiendo tar na cai tol día como un peligru ciertu pa ti. “Les instituciones polítiques, policiales y xudiciales tienen la obligación d’actuar rápida y eficientemente frente a la violencia de xéneru y tienen la responsabilidá d’aplicar les sentencies condenatories” aporfió. Darréu la so intervención y nun fondu respetu lleéronse los nomes de les víctimes mortales no que va d’añu. Que nun s’escaezan los sos nomes.

Susana Sela