L’alcuentru internacional de mocedá falantes de llingües minorizaes axuntó a más de noventa representantes de comunidaes llingüístiques, asociaciones culturales y responsables institucionales
Iniciativa pol Asturianu, organización de reivindicación llingüística comprometida cola defensa, promoción y revitalización de la llingua asturiana, tuvo presente un añu más nel alcuentru HIGA! 2025 na ciudá de Vitoria-Gasteiz. Víctor Manuel Fernández, vocal delegáu de la entidá en Madrid, foi el representante de l’asociación nesta convocatoria de mocedá falante de diferentes idiomes minorizaos pa presentar la realidá llingüística del asturianu y tamién pa conocer midíes que se podríen implementar n’Asturies pa llograr nuevos espacios de normalidá pal idioma.
Esti certame de mocedá falante de llingües minorizaes pretende revitalizar los idiomes y fomentar la collaboración ente diferentes comunidaes llingüístiques a nivel mundial. La convocatoria xenera un espaciu pa que les nueves xeneraciones revitalicen les llingües de les sos comunidaes, aprendan y practiquen estratexes pa llograr caltener la so cultura y patrimoniu, y formen, al mesmu tiempu, redes de collaboración.
A lo llargo del foru, el representante de l’asociación participó en dellos talleres y espacios de diálogu, compartiendo esperiencies y estratexes pa la preservación y el fortalecimientu del asturianu. De manera concreta, Víctor Manuel Fernández, representante de la entidá, recalcó la importancia d’integrar les llingües minorizaes nel ámbitu educativu -como afiten la Llei d’Usu y la Carta Europea de les Llingües- y tamién nel ámbitu tecnolóxicu pa garantizar la so tresmisión a les nueves xeneraciones; asina como aprovechar el potencial que podría tener la Intelixencia Artificial pal casu de la llingua asturiana.
“HIGA! 2025 foi una plataforma prestosa pa texer redes con organizaciones afines de distintos territorios y pa visibilizar la riqueza llingüística que xeneren los idiomes. Munchos participantes treslladáronnos la importancia de cuntar col estatus d’oficialidá del asturianu y del eonaviego p’asegurar el futuru del nuesu patrimoniu llingüísticu”, destacó Fernández.
Amás de la so participación nes actividaes programaes, Iniciativa pol Asturianu faló de dellos proyectos nos que collabora como ye’l casu del Archivu de la Represión Llingüística del Asturianu [ARLAS] que recueye testimonios de persones que sufrieron casos de discriminación llingüística y tamién de los grupos de conversación telemáticos n’asturianu. Les iniciatives pretenden, per un llau, reconocer a les persones que nun se-yos permitió falar asturianu y por otru acercar l’idioma a nuevos falantes.
HIGA! 2025 axuntó a más de noventa representantes de comunidaes llingüístiques, asociaciones culturales y responsables institucionales, col oxetivu común de defender la diversidá llingüística y promover polítiques actives de protección de les llingües minorizaes en tol mundu.
Susana Sela
This work is licensed under a Creative Commons Attribution 4.0 International License.
