Si n’iviernu hai que falar de probitú enerxética cuando se valora la falta de calefacciones nos llares asturianos, en branu tenemos qu’asumir que la población asturiana nun tien medios económicos pa mercar aires acondicionaos, un recursu que fasta agora yera innecesariu pero que’l cambeu climáticu entama a facer vital, en munchos casos.

El sistema de Monitorización de la Mortalidá diaria (MoMo) del Institutu de Salú Carlos III atribui al calor 28 de les muertes que se produxeron nel periodu comprendíu pente’l 16 de mayu ya’l 13 de xunu, un  2700% más que nel mesmu periodu del añu pasáu.

Seique AEMET considera que’l mes de mayu foi climáticamente típicu asturianu, con una media de 13 grados de temperatura, los picos puntuales nos que se superaron los 30 grados, una temperatura a la que los asturianos y asturianes nun tamos avezaos, xeneraron serios problemes de salú que derivaron  nesi total de 28 finaos, toos ellos mayores de 50 años y mayoritariamente muyeres, ya que son más vulnerables que los homes a los efeutos del calor. 

Los datos costaten, según Sanidá, ‘episodios térmicos d’intensidá escepcional’ que llevó a esti xorrecimientu de muertes atribuyibles a les foles de calor. Les previsiones meteorolóxiques apunten a que’l mes de xunetu continuará con temperatures perriba de les avezaes. 

Llucía F. Marqués

This work is licensed under a Creative Commons Attribution 4.0 International License.