Acuchillá en mediu la cai; tirada en cachos a la basoria; golpeá y acuchillá fasta morrer. 49, 39, 86 años, en Xixón, en Sama, en Llaviana, la llácara de la violencia machista lloñe de desapaecer medra. Pa Carme Pérez, d’Andecha Astur, ta mui nidio “el sistema nun funciona”
Esta mañana un home mataba a golpes y cuchillaes a la muyer pa lluéu intentar-ensin ésitu- suicidase. L’asesín, de 90 años, afirma que lo fizo “porque ya nun podía curiar d’ella”, que tenía 86 años. La ‘esculpia’ -que nun lo ye- cuadra mal col fechu de que tuvieren una curiadora que se facía cargu de los dos y cola estrema violencia del métodu escoyíu pa matala.
Va ocho dies apaecía tirada, lliteralmente, a la basoria, Susana Sierra, en Xixón. El 31 de xineru inaguraba la llista Karilena Charles, de Sama, asesinada metanes la cai pol so compañeru de pisu, tamién a cuchillaes. Güei ye Dolores, polesa d’86 años la que suma una más, o una menos.
Son tres namás n’Asturies, 42 en tol estáu, contabilizando namás a les muyeres que son asesinaes pola so pareya o persona cola que calteníen una relación de cercanía. Asturies rexistró nel primer trimestre 47.865 denuncies, una cifra que medra añu tres añu, non solo pol repunte de casos sinón porque ca vuelta son más les que, pesi a toles dificultaes qu’implica, s’atreven a denunciar.
Namás el 68% de les que soliciten protección la reciben.
Carme Perez Antolín, en representación d’Andecha Astur, que participa mensualmente nes concentraciones contra la violencia machista delantre la Gota Llechi en Xixón, insiste en que’l sistema nun funciona “Hai que dexase de demagoxa. Nun val de ná reunise en ‘gabinetes de crisis’ y facer menutos de silenciu ca vegada que s’acumulen les muyeres asesinaes enriba la mesa. Esti ye un problema social de primer orde que tien d’abordase d’una vegada a fondu, en serio y dende distintos frentes: el xudicial, l’educativu, l’económicu…. Si non, seguiremos teniendo motivos pa minutos de silenciu” vaticinó.
Llucía F. Marqués
This work is licensed under a Creative Commons Attribution 4.0 International License.
