Dende XEGA (Colectivu LGTBI+ d’Asturies) convoquen a la manifestación del día 28 por mor del Arguyu 2025
Baxo’l llema ‘¡Vergoña! 20 años dempués ¡Asturies ensin llei LGTBI+!’ El colectivu torna a reclamar y desixir l’aprobación d’una llei autonómica LGTBI+ que permita qu’Asturies se ponga al día en derechos LGTBI+. Agora mesmo Asturies ye, xunto con Castiella y Llión, de los únicos territorios del Estáu que nun tienen entá una llei que garantice y protexa los derechos de la comunidá. Amás, denuncien la fola reaicionaria de la estrema derecha y les sos consecuencies sobre’l colectivu LGTBI+, non solo nel ámbitu nacional y estatal, sinón tamién nes polítiques internacionales, apuntando a la prohibición de manifestaciones n’Hungría, por casu, o a la negativa d’EEXX a reconocer la identidá de les persones trans. Por ello faen un llamamientu a la participación de tola ciudadanía y del movimientu social asturianu pa defender los derechos humanos, los derechos sexuales, la diversidá sexual y la identidá de xéneru. El manifestamientu, que pon el ramu a un mes apináu d’actividaes vindicatives, sedrá’l 28 de xunu y saldrá a les 18:00 h del Paseu de Begoña en Xixón, pa terminar na Plaza del Conceyu.
This work is licensed under a Creative Commons Attribution 4.0 International License.
