El movimientu sindical nun se da nin abandona a Les 6 de La Suiza na cuenta atrás pal so ingresu en prisión: 22 organizaciones sindicales reclamen l’indultu de les sindicalistes con una gran movilización en Xixón el próximu 29 de xunu
El manifestamientu, que s’espera multitudinariu, saldrá a les 12.30 hores, del paseu de Begoña de Xixón, baxo’l llema ‘Seis de La Suiza Llibertá’, percorriendo les cais de Xixón fasta’l Palaciu de Xusticia.
A la cita cuéntase qu’acudan non solo la población asturiana sinón dellos autobuses procedentes d’estremaos puntos del estáu, movios pol fechu de qu’esta conderga afeutanos a toos: si les procesaes acaben por cumplir los tres años y mediu de cárcele el precedente llegal pon en pelligru tola llucha social y sindical. “Xugámonos muncho” resumía la situación Álvaro del Río, representante de la Confederación Nacional del Trabayu (CNT), na rueda de prensa ofrecida en la sede del Conseyu de Mocedá de Xixón, afondando na cuestión de que non solo se yos xuzga por ser sindicalistes, sinón por ser muyeres que defenden a otres muyeres.
La opinión foi compartida por tolos representantes sindicales presentes, que ven nesti casu un claru casu de dispreciu, represión y acosu al sindicalismu ante’l que, avisen, nun tan dimpuestos a recular.
Mariano Suárez, en representación del sindicatu asturianu LCT, recalcó qu’esti casu ye una violación clara de los drechos sindicales y una persecución de l’actividad sindical pa la que la única solución ye política, al traviés d’un indultu, que ye lo que les 22 organizaciones convocantes soliciten y que lleva semanes pidíu, n’espera de rempuesta.
Esa ye la cabera opción que tienen pa torgar o minimizar el so pasu pela cárcele, depués de que a entamos de xunu se refugare’l so recursu contra l’autu del xuez Lino Rubio Mayo, el mesmu que robló la sentencia en 2022 y quien decide agora el futuru de les sindicalistes, diendo incluso en contra’l criteriu de la fiscalía al negase a suspender la conderga, daqué que según denuncien dende la Plataforma de la Abogacía en Defensa de l’Acción Sindical “evidencia un exerciciu de Drecho Penal inquisitivu y vengativu”.
Afeutaes y sindicatos faen un llamamientu a manifestase el prósimu 29 de xunu, demostrando la xunidá del pueblu y de tolos sindicatos, de los más combativos a los más conservadores, “porque esto ye daqué que mos afeuta a toos y a toes”.
Llucía F. Marqués
This work is licensed under a Creative Commons Attribution 4.0 International License.
