El Bopa recueye’l permisu pa la costrucción d’un nuevu parque eólicu na Reserva de Biosfera del ríu Eo, Ozcos y Tierra de Buron, contradiciendo les promeses feches pol propiu Principáu
Trátase d’un parque con 10 molinos d’una potencia de 5 Mw, con eroxeneradores que van tener un altor de 200 metros con 125 de buxe y 149 de rotor y con una llínea aérea d’alta tensión de 132.000 voltios de más de 14 kilómetros a la subestación de Pezós, que pretende instalase ente Villanueva y San Martín d’Ozcos, en terrenos mayoritariamente d’especial protección y pesi a que’l planiamientu actual del conceyu prohibe estes instalaciones nesti suelu.
Esti parque eólicu y la so llínea d’evacuación van tar allugaos dientro de la reserva de la biosfera y va afectar a los espacios naturales y a la parte d’especial protección comuñal.
La tramitación d’estos proyectos implica una contradicción dientro’l propiu Principado, ya que’l Gobiernu d’Asturies declarare na Xunta Xeneral nes pasaes llexislatures que diba escluyise’l desendolcu de parques eólicos en parques naturales y zones protexíes.
Na actual Reserva de la Biosfera yá tán funcionando 5 parques eólicos (Candal, Chao das Grallas, Bobia, Villanueva, A Xunqueira) hai 8 autorizaos (Vientu Castelo, Eirua, Folgueiras, Chao Gran, Santalla, Pousadoiro, Turia, Escorpio) y hai otros 12 parques proxectaos.
La Coordinadora Ecoloxista d’Asturies, principal denunciante d’estes situaciones, ta inda esperando que toles denuncies que presentaron nes caberes décades polos daños ambientales, urbanísticos y al padremuñu históricu, queden resueltes.
Susana Sela
This work is licensed under a Creative Commons Attribution 4.0 International License.
