La superficie ocupada pol ocalitu n’Asturies ronda les 60.000 hectárees, 340 d’elles dientro d’espacios declaraos comu protexíos

En víspores del 9º Congresu Forestal, que se cellebra en Xixón ente’l 16 y el 20 de xunu,25 organizaciones de calter ecoloxista d’Asturies, Galicia, Cantabria y Euskadi suscribieron un escritu nel que demanden l’ampliación de les actuales moratories a los nuevos plantíos d’ocalitu en Galicia y Bizkaia hasta, siquier, l’añu 2030, estendiendo esta midida a Asturies, Cantabria y al restu de territorios d’Euskadi;  piden reabrir l’alderique sobro l’impactu de los ocalitos naturalizaos sobro los ecosistemes y les especies, insistiendo na necesidá d’una progresiva erradicación del ocalitu en zones de Rede Natura 2000. 

Nesa llinia, piden que los actuales borradores del Plan Forestal d’Asturies (PFA) y el Plan d’Ordenación de Recursos Forestales del Principáu d’Asturies (PORFPA) incluyan l’afitamientu d’una moratoria a los nuevos plantíos d’ocalitu hasta, siquier, 2030. Mientres el tiempu que dure la moratoria, l’alministración forestal tendrá d’enfrentar ente otres cuestiones, el futuru de los plantíos granibles de coníferes, la superficie máxima que van poder ocupar l’ocalitu nel futuru, la prohibición del Eucalyptus nitens (que pola so resistencia al fríu puede espolletar en zones del interior d’Asturies), la retirada progresiva del ocalitu de los espacios naturales protexíos y cómo resolver los problemes xeneraos pola naturalización del ocalitu fora de los plantíos. Ye fundamental la paralización de proyectos como la fábrica de celulosa de Altri en Llugo, que va demandar grandes volumes de madera d’ocalitu nel norte .

“El 2025 ye un añu clave pa tomar les decisiones qu’eviten un procesu d’ocalitización n’Asturies, daqué que yá se produció en Galicia. Non pue dexase que’l sector forestal del norte de la península camine escontra’l monocultivu económicu de la producción de celulosa. Non solo tán en xuegu la diversificación  y el caltenimientu de les diverses cadenes de valor, sinón la busca d’una meyor adaptación de los ecosistemes al cambéu climáticu, con nuevos modelos de xestión forestal de plantíos qu’eviten que la situación actual repita dientro d’unos años”, declaren les organizaciones firmantes. 

Acordies los datos de los estremaos inventarios forestales nacionales, los plantíos d’ocalitu siguen estendiéndose na mayoría de territorios del noroeste y el norte de la península ibérica. Al incumplimientu de la planificación forestal, nos caberos años sumóse’l xorrecimientu de la superficie d’estos plantíos, motiváu fundamentalmente pola sustitución masiva de plantíos granibles de coníferes (pinu de Monterrey y pinu marítimu fundamentalmente) que tán siendo afectaes por delles plagues forestales. Como respuesta a esti problema, les alministraciones forestales respectives afitaron prohibiciones temporales (en Galicia, dende 2021 hasta finales de 2025, y en Bizkaia, dende 2022 hasta finales de 2025) pa intentar evitar la sustitución masiva de coníferes por ocalitos. Estes prohibiciones temporales sumáronse a la yá esistente dende 2017 en Portugal, y que va tar vixente hasta 2030, lo que provocó que les empreses papeleres luses tean mercando y arrendando plantíos d’ocalitu en Galicia y Asturies, aumentando la presión nestos territorios. 

“N’Asturies y nel restu de los territorios del norte de la península, los ecoloxistes pidimos una moratoria a los nuevos plantíos d’ocalitu pa evitar l’actual crecedera de la superficie ocupada por esti árbol, en tantu nun s’asegure’l cumplimientu de los oxetivos de la planificación forestal, la diversificación de les mases granibles pa tola cadena de valor del sector forestal y salvaguardar de los ecosistemes y los espacios naturales protexíos”, remarquen les organizaciones. 

N’Asturies, la moratoria a los nuevos plantíos que tuvo a valir ente 2009 y 2014 foi llevantada darréu pa permitir nuevos plantíos de Eucalyptus globulus. De magar 2022, desoyendo los encamientos de técnicos y científicos de la década anterior entamaron a autorizar tamién dellos plantíos de Eucalyptus nitens, que pola so resistencia a zones de mayor altitú nunca se dexaren hasta esa fecha. Anguañu, y según el PORFPA, la superficie d’ocalitales ocupa una estensión en 58.704,87 ha, magar el 4º Inventariu Forestal Nacional y les sos revisiones daben una cifra que bazcuya ente les 57.000 y les 60.000 ha., ensin tener en cuenta les superficies forestales onde l’ocalitu apaez acompañando a mases mistes o n’estáu de naturalización. L’actual borrador del Plan Forestal d’Asturies establez un techu máximu pal ocalitu de 61.830 hectárees, pero contemplen l’autorización d’el  nitens de la que, dende 2023, ta autorizándose el so plantíu nun contestu de falta de tresparencia y tapecimientu d’información a la sociedá civil. El Gobiernu del Principáu pretende, amás, llegalizar nel nuevu plan les superficies plantaes illegalmente con esta especie.

“Esti riesgu d’ocalitización nel norte de la península, que yá se peracabó en Galicia, produzse nun momentu nel que la Xunta de Galicia dio lluz verde a una nueva fábrica de celulosa, el proyectu GAMA de la papelera portuguesa ALTRI, qu’amontaría nun futuru próximu la demanda de madera d’ocalitu. ALTRI y l’espansión de los plantíos d’ocalitu son lo mesmo. Tenemos que parar esti despropósitu”, remarquen  les organizaciones.

Según el 4º Inventariu Forestal Nacional (IFN4), con datos de fai más d’una década (2009), n’Asturies hai 340 hectárees de plantíos d’ocalitu dientro de los espacios naturales protexíos. A esta cifra, que bien probablemente va ser mayor na actualidá, habría que sumar la superficie onde l’ocalitu nun ye la especie dominante y apaez en mases mistes (con otres especies) dientro de plantíos de coníferes o nel interior de montes de ribera y ecosistemes naturales onde se naturalizó. De resultes, tola rasa costera ta afectada pola eucaliptización y tolos espacios Rede Natura 2000 de la mariña asturiana tán afectaos, siendo especialmente grave na Reserva Natural Parcial de la Ria de Villaviciosa, (ZEC y ZEPA) o  la Reserva de la Biosfera de Rio Eo, Ozcos y Terras de Burón (ZEC y ZEPA). El 50 % de les ZEPA d’Asturies tienen plantíos d’ocalitu o hai problemes de naturalización, según toles Zones d’Especial Caltenimientu de la mariña y fluviales del norte d’Asturies. 

Pa les organizaciones que roblen la declaración, “ye fundamental reabrir l’alderique sobro l’impactu de los ocalitos qu’espolleten fora de los plantíos y la so interacción colos ecosistemes. Va unos años, l’alministración forestal del Estáu español cerró en falsu esti alderique al traviés d’una decisión con demasiaos componentes políticos, decidiendo esconder so l’alfombra les evidencies del efectu sobro la biodiversidá de los ocalitos naturalizaos nos diversos territorios”. 

Los ecoloxistes piden que s’estableza, nel senu del Ministeriu de Transición Ecolóxica y Retu Demográficu (MITERD), un grupu de trabayu multidisciplinar qu’encete los efectos sobro la biodiversidá de la espansión del ocalitu fora de los plantíos, n’especial nel interior de los espacios naturales protexíos, y la evaluación de los costos económicos dl so desaniciu en zones de Rede Natura 2000. Dicha solicitú yá foi espresada a la ministra y el secretariu d’Estáu del MITERD na xunta del 22 de mayu del Conseyu Forestal Nacional, y repitida nel Conseyu Asesor de Mediu Ambiente (CAMA) el pasáu 2 de xunu. Les organizaciones firmantes piden tamién que’l Plan Nacional de Restauración de la Naturaleza d’España, n’estáu d’ellaboración nestos momentos per parte del MITERD, incluya proyectos de restauración d’árees afectaes por ocalitos naturalizaos dientro d’espacios naturales protexíos, según la eliminación progresiva de los plantíos comerciales d’ocalitu dientro de la Rede Natura 2000.

Les 25 organizaciones que firmen la declaración son: AEMS-Ríos con Vida, Amigas de la Tierra, Asociación Asturiana Amigos de la Naturaleza (ANA), Asociación Custodia Bosque Atlántico (BETULA), Asociación para la Defensa de los Recursos Naturales de Cantabria (ARCA), Asociación para la Recuperación del Bosque Autóctono (ARBA), Baso Biziak Plataforma, Butroi Bizirik en Transición, Coordinadora Ecoloxista d’Asturies, Eguzki, Ecologistas en Acción, Fundación Lurgaia, Fundación Montescola, Greenpeace España, Kukubaso Elkartea, Mariko Baso Espazioa, Mutrikuko Natur Taldea, Sagarrak Ekologista Taldea, SEO/BirdLife, Sociedade Galega de Historia Natural (SGHN), Sociedad de ciencias naturales de Sestao, SOSollube, Txirpial, Verdegaia y WWF España.

Nel Dos Santos