Lo que Divertia llama “Paseo Gastro” nun ye otra cosa qu’una feria de chiringuitos con vasos de plástico, basora pel suelu y arumes pocu prestosos. La idega d’allargalo al Puertu Esportivu, al pie de Cimavilla, cortando el tráficu y poro la entrada al barriu, ofiende a los playos, fartucos de lo que llamen “asediu del ociu y del turismu, tanto nuecherniegu comu diurnu” y de que nun se-yos tenga en cuenta pa les decisiones qu’afeuten el so día a día. Falamos d’una de les zones más tensionaes de Xixón, que lleva años revindicando el so drechu a esistir como barriu y non comu escaparate turísticu. Los vecinos nun descarten entamar movilizaciones si se sigue alantre col proyeutu, del que nun recibieron información direuta por parte del ayuntamientu nin de Divertia, nin van recibila fasta’l día 15.

“Esto ye una tomadura de pelo”, afita Sergio Álvarez, presidente de l’Asociación de Vecinos de Cimavilla, ‘Gigia’ “falamos d’un barriu al que se corta la entrada tol añu con ca eventu, preba esportiva o cita relixosa, masificáu en branu, con dificultaes pa entrar, salir y vivir” arrepostia.

La Federación d’Asociaciones de Vecinos de Xixón, per otru llau, desmienten les pallabres del conceyal cuando afirma qu’aconceyaron colos vecinos y que yos paez bona idega “nin se faló colos vecinos y vecines afectaos pol cierre, ni se habló cola Federación d’Asociaciones Vecinales d’esi proyectu de Gastro; nun tamos d’alcuerdu cola ubicación anterior y cola que se pretende agora. Apoyamos plenamente les quexes de los vecinos y vecines de Cimavilla”.

La plataforma Hostelería Con Conciencia (HCC) vien de sumase agora a les protestes, apuntando que aparte del dañu a los vecinos el Paseo Gastro ye contraproducente pal texíu hosteleru de Xixón, vivu tol añu y enfocau a la población, non estacional y centráu nel turismu “Al final, de lo que falamos ye d’empreses privaes esternes que van a llevase los beneficios esfrutando del usu de suelos públicos en plena temporada estival mientres los chigres de siempre seguimos pagando tases, como la de terraza… Qu’enriba, xube n’agostu”.

Destaca nesti tema la falta de coherencia del Executivu xixonés, que per un llau dende Visita Xixón presumen d’un Plan Estratéxicu de Turismu 2025-2035 que quier posicionar a Xixón como destín caltenible, responsable ya inclusivu, “capaz d’equilibrar el crecimientu económicu cola preservación de la identidá llocal y la convivencia colos vecinos”. Cualquier semeyanza cola realidá ye pura coincidencia.