El grupu Sofitu a Les 6 de La Suiza vien de denunciar que nel día d’ayeri entamó la represión policial contra’l movimientu social qu’esixe la llibertá de les seis sindicalistes condergaes
Los fechos ocurrieron mientres un grupu de persones asitiaben per Xixón delles pancartes que reivindicaben la llibertá pa Les 6 de La Suiza, ensin causar nengún tipu de dañu al moblame urbanu nin a instalaciones públiques o privaes. Un abondosu comandu policial procedió a reteneles, con dellos vehículos de la Policía española y un coche policial camufláu, identificando con brusquedá a estes persones solidaries con Les 6 de La Suiza, desixéndose-yos inclusive datos personales que nun veníen al casu. Tamién rexistraron el vehículu nel que se movíen y requisaron, ensin motivu dalgún, parte del material qu’había nélli. De la mesma, menaciaron a les compañeres con supuestes acciones xudiciales.
El Grupu Sofitu Califica esta intervención policial como un exerciciu inxustificable d’acosu, presión
y menacies a llibertaes ciudadanes básiques, como les d’espresión y circulación.”Daquién ordenó una vuelta de tuerca más nel procesu de represión de l’actividá sindical, de cuenta qu’agora escuérrese non yá a quien exercen derechos sindicales sinón tamién a les compañeres que les sofiten” declararon nel comunicáu que fae públicos estos fechos.
Denuncien tamién que los esfuercios por parte del gobiernu asturianu se cientren en reprimir a los ciudadanos en llugar de a xestionar un inmediatu tercer grau pa cuando encarcelen a Les 6 de La Suiza y un indultu urxente “ésa ye la solución política, ética y xusta al conflictu. Porque lo contrario, la medría de la represión, namá va xenerar másrespuesta social y a allargar un conflictu que toes, Gobiernu y trabayadores, tenemos la obligación de solucionar.
Esta tardi, a les 19:00, ta convocada una concentración de sofitu a Les 6 de La Suiza na Plaza Conceyu.
Nel Dos Santos
This work is licensed under a Creative Commons Attribution 4.0 International License.
