El profesoráu de la escuela pública asturiana atópase nun conflictu de caláu que yá trascendió les aules. La fuelga indefinida convocada polos sindicatos mayoritarios nun ye una pataleta, como llegó a insinuar la la Conseyera d’Educación, Mercedes González, sinón una rempuesta contundente a años de despreciu, sobrocarga y promeses incumplíes.
“Tán acabando con esta profesión y quien que callemos”
“Na Conseyería piensen que somos funcionarios que tenemos vacaciones de sobra, pero tán acabando con esta profesión: burocracia ensin xacíu, ratios imposibles y un despreciu constante”, desplica un profesor de secundaria del Valle del Nalón. Como elli, cientos de docentes sienten que la Conseyera ye una figura desconectada de la realidá de les escueles, y que les sos declaraciones nun faen más que echar lleña al fueu.
Una xestión d’espaldes a la comunidá educativa
El malestar vien de lloñe. L’aplicación de los nuevos currículos ensin preparación, el recorte de plantiyes de sofitu, la negativa sistemática a baxar les ratios y la precariedá na que s’afayen los interinos, sumáu al silenciu de la Conseyería énte toes estes demandes, cristalizó nuna fuelga que nun paez tener intención de recular.
“¿Cómo vamos enfotamos nuna Conseyera que lleva años ignorándonos y que mos trata d’inresponsables por defender una educación de calidá?”, pregunta retóricamente una mayestra d’Educación Primaria n’Avilés.
Reivindicaciones clares y escaecíes
Los docentes lleven más d’una década pidiendo:
- Reducción de ratios pa una enseñanza digna.
- Estabilidá real del profesoráu interín, con procesos claros y xustos.
- Recuperación de drechos llaborales perdíos nel 2012 y nun restablecíos.
- Menos burocracia y más tiempu pa educar, ensin convertir el trabayu docente nun trámite alministrativu.
La Conseyera, ensin dar una sola solución concreta, sigue falando de “llimitaciones presupuestaries” y de “diálogu abiertu”, cuando na práutica nun recibe a los sindicatos dende febreru.
Un futuru que pue marcar un enantes y un dempués
El profesoráu asturianu ta fartu. Fartu de silencios, de desprecios y d’una Conseyera que, según munchos, “nun representa a quien ta cola tiza na mano díi ente díi”. La fuelga indefinida ye una llamada d’atención non solo al Gobiernu autonómicu, sinón tamién a una ciudadanía que nun pue quedar indiferente énte’l deterioru de la escuela pública.
“Nun tamos pidiendo sueldos millonarios. Tamos pidiendo condiciones pa poder enseñar. Si eso nun-yos importa, ¿qué clas d’educación quieren pa Asturies?”, entruga otra docente, col corazón en ca pallabra.
Marcos A. F.
This work is licensed under a Creative Commons Attribution 4.0 International License.
