El Plan Llave ye, de fechu, una cesión de recursos públicos a empreses privaes, privatizando suelu públicu, padremuñu común de la ciudadanía

L’Ayuntamientu Xixón anunció pa esti mandatu la llicitación del Plan Llave, consistente na construcción de de 500 viviendes. La primer fase va ser de 6 parceles pa 120 viviendes, que van cambiase pola probe cifra de venti que van quedar en propiedá del Ayuntamientu, quedando toles viviendes nun réxime de Vivienda Protexida Concertada (VPC). L’Ayuntamientu de Xixón anunció una segunda fase del Plan llave, que va llevase a cabu na zona Sanz Crespo-Carlos Marx, con 300 nueves viviendes. Pero ¿Hasta qué puntu eses viviendes solucionen el problema de l’habitabilidá nel conceyu?

Agora mesmo en Xixón hai disponibles más de 8.000 viviendes vacíes, ello ye, nun fae falta nueva vivienda polo menos fasta qu’esa s’utilice; sicasí, cuando’l gobiernu xixonés se plantega soluciones pa la falta de vivienda nun se-yos pasa pela tiesta movilizales, nin regularizar los arriendos o frenar l’usu turísticu de les viviendes, sinón que por contra óptase por regalar suelu públicu a constructores privaes.

Ye por ello que dende organizaciones comu Andecha Astur o Asturies Insumisa denuncien qu’el nomáu

 Plan Llave de Xixón nun ye otra cosa qu’un procesu de privatización de suelos públicos y una operación especulativa encubierta que, en pallabres d’Asturies Insumisa “lloñe de garantizar l’accesu a la vivienda, perpetúa un modelu fallíu basáu na construcción indiscriminada y la privatización del suelu públicu”.

Esti plan, argumenten, nun respuende a la urxente necesidá de vivienda en Xixón, sinón a la presión de la patronal inmobiliaria y constructora,”cuyu únicu oxetivu ye garantizar la so rentabilidá ensin importa-yos la necesidá social de vivienda”.

Nel Dos Santos

This work is licensed under a Creative Commons Attribution 4.0 International License.