Asturies Insumisa desplegó delles pancartes antimilitaristes nel Parque’l Muelle d’Avilés, onde va tener llugar un desfile militar, dientru los actos dedicaos al Día de les Fuerces Armaes d’esti añu.
La organización denuncia que”el Gobiernu municipal d’Avilés, Izquierda Unida y PSOE, ya’l Gobiernu asturianu, continúen collaborando y esbardiando recursos n’exhibiciones militares inútiles, que nun sirven pa nada, mientres que los servicios públicos, como la sanidá, la educación o los servicios sociales, siguen deteriorándose por falta d’inversiones en personal y medios”.
P’Asturies Insumisa esti tipu d’espectáculos militaristes son un sistema propagandísticu col que blanquiar la imaxe de los exércitos, asoleyando una imaxe bonal de los soldaos que nun tien nada que ver cola realidá de la guerra a la que tan destinaos.
“Más allá d’estes llamatives exhibiciones, el militarismu nun ufierta nengún camín hacia la gloria, sinón hacia la guerra y, pa munchos, nin siquier tien un camín de vuelta a casa. Pero d’eso nun se diz nada nos desfiles” aporfien.
Na so campaña remembren les pallabres recoyíes nel programa eleutoral d’Izquierda Unida, formación que gobierna, col PSOE, n’Avilés: “Apostar pola educación pola paz. Refugar el programa de “cultura de defensa”. Nun contestu de violencia, racismu, discriminaciones, etc., ye necesario impulsar la educación pola paz, nun insistir en promocionar la “cultura de defensa” y, con ella, facer una apoloxía del militarismu y l’armamentismu”, unes declaraciones que contrasten fuertemente con organizar desfiles militares pel mediu la ciudá.
Nel Dos Santos
This work is licensed under a Creative Commons Attribution 4.0 International License.
