La Plataforma Salvemos Peñamayor convoca esti domingu 18 de mayu una marcha revindicativa pa desixir la revocación de los permisos ‘Astur A’
La marcha cuntará con cuatro posibles percorríos, dependiendo del conceyu de partida. Pa quienes prefieran dar un paseu más curtiu, proponen tamién puntos de salida en cada conceyu pa finar toos en Fayacaba.
Estes marches enmárquense dientro de les acciones coles que la Plataforma quier frenar l’avance de la investigación minera ASTUR A, concedíu pol Gobiernu del Principado a la empresa británica Technology Minerals PLC. Esi permisu implica la investigación de cobaltu, cobre, níquel, oru y plata na Sierra de Peñamayor, afectando a los conceyos de Llaviana, Nava, Bimenes y Piloña. “Queremos detener cualquier actividá minera en Peñamayor y alredores que puea tener consecuencies irreversibles pa la nuesa salú, el nuesu entornu y la nuesa tierra” destaquen los organizadores, que s’oponen a la investigación y estración de minerales na Sierra de Peñamayor y lluchen por preservar el monte y les actividaes tradicionales, defendiendo’l so drechu a decidir el so futuru: “Nun podemos permitir qu’esti proyectu mineru arruine lo que xeneraciones costruyeron y crearon”.
La Plataforma Salvemos Peñamayor ta formada por vecinos y vecines de Nava, Llaviana, Bimenes y Piloña, xunios pa defender la so tierra y conservar l’estilu de vida qu’esfrutaron durante xeneraciones, frente a proyectos mineros que menacien el so entornu ya’l so futuru.
Susana Sela
This work is licensed under a Creative Commons Attribution 4.0 International License.
