El movimientu J2, formáu por profesionales de l’abogacía y al que s’incorporaron tamién procuradores, trata de visibilizar la grave problemática y reivindicaciones más urxentes rellacionaes cola protección social d’aquellos que tienen la condición de mutualistes alternatives al RETA
Hasta’l 1995, la protección social de l’abogacía emprestábase al traviés de la Mutualidá de l’Abogacía, entidá ensin ánimu d’arriquecimientu creada polos Colexos d’Abogaos, de adscripción obligatoria pal exerciciu profesional, cubriendo principalmente la prestación por xubilación y ensin cuntar con asistencia sanitaria, que tenía de ser contratada aparte. A partir d’esa fecha abrióse la posibilidá de contratar la protección social tamién por aciu l’afiliación al RETA (Réxime Especial de Trabayadores Autónomos). Pa caltener l’afiliación, los Colexos profesionales de l’Abogacía potenciaron la Mutualidá, ufiertando meyores condiciones; amás, munchos mutualistes perderíen tou lo apurrio si camudaben al RETA, polo que fueron munchos los que nun camudaron de sistema, a pesar de la privatización posterior de la Mutualidá.

Agora atópense con que nun se tán cobrando los importes previstos, les sos pensiones vitalicies son inferiores a les non contributives del sistema públicu, percibiendo cantidaes ente los 300€ y los 600€, ensin actualización prevista hasta’l fallecimientu. La escasa cobertoria social de la mutualidá fai qu’un mutualista nun xenere drechu a prestación por viudez, orfandad, incapacidá permanente o total o situación de IT por salú mental.
Nun tienen plan de previsión social, los importes pagaos nun pueden treslladase a otru plan de pensiones más rentable nin al RETA y llegada la edá de cobru la carga impositiva de solicitar esos fondos implicaría la perda d’hasta un 40% de los mesmos. Amás, los accidentes réstense de les mesmes aportaciones y estes tán suxetes a xubíes aleatories ensin posibilidá de negociación nin d’abandonar los pagos ensin perder lo apurrío,

Lo que soliciten los mutualistes  ye una pasarela de treslláu al RETA, de forma voluntaria, na que los mutualistes que lo deseyen puedan recuperar les sos aportaciones con destín al RETA, garantizando’l drechu a una pensión pública mínima digna, en condiciones similares a los cotizantes en RETA. Tamién soliciten l’ameyoramientu de les prestaciones y condiciones de la xubilación de los profesionales de l’abogacía y procuradoría.
Los afectaos denuncien falta de trasparencia per parte de la Mutua, desinformación sobro les cuanties a percibir y cambeos de condiciones que llevaron a que persones que cotizaron mientres tola so vida llaboral tean cobrando pensiones ínfimes.

Llucía F. Marqués

This work is licensed under a Creative Commons Attribution 4.0 International License.