La violencia machista ye una llaceriosa realidá que sigue bien presente n’Asturies, col caltenimientu de patrones de dominación patriarcal que se traducen nuna violencia continua escontra les muyeres: ca añu rexístrense decenes de denuncies, agresiones y asesinatos machistes
Acordies los datos oficiales del Ministeriu d’Igualdá y el Institutu Asturianu de la Muyer, Asturies ye una de les zones del estáu con mayor númberu de denuncies per cada 10.000 habitantes. En 2024, rexistráronse más de 2.000 denuncies por violencia de xéneru. A ello hai que sumar el gran númberu de casos que nun lleguen nunca a los xulgaos, por miéu, dependencia económica o presión social.
La violencia machista nun ye un asuntu priváu. Ye una manifestación brutal d’un sistema que reproduz la desigualdá ya’l control sobre les muyeres. Llograr una Asturies llibre de violencia machista implica un esfuerciu conxuntu: individual, social, institucional. Mentantu, cada vida perdida, cada agresión, cada muyer que vive con medrana, ye una derrota pa tola sociedá.
La violencia nun ye solo física. Tamién ye psicolóxica, económica, sesual, llaboral … por eso se fala de violencies contra la muyer, en plural. La visibilización del problema ye esencial, polo que ca caberu miércoles de mes la plataforma entamada por Andecha Ástur, Anticapitalistes, Amamantar, l’Asociación de Pensionistes de Xixón, l’Asociación Ecofeminista Petra Kelly d’Asturies, el Colectivu de Trabayadores, Feminismu en Llucha del CSI, la plataforma del serviciu d’ayuda a domiciliu -SAD-, Podemos y Verdes-Equo convoca esti manifestamientu delantre la Gota Llechi, en Xixón.
Susana Sela
This work is licensed under a Creative Commons Attribution 4.0 International License.
