Del 4 al 6 d’abril Mieres acueye la folixa que recibe a la primavera con tres xornaes de música y cultura asturiana na que van ser protagonistes la sidre, el baille’l país, la música, la cultura y la gastronomía

Mieres enllénase de música’l país cola Folixa na Primavera. Del 4 al 6 d’abril, nel Parque Xovellanos y nel d’Aníbal Vázquez, en Mieres Centru Cultural, nes places Requexu y La Pasera, y peles cais de Mieres del Camín. 

El pregón nesta edición va dir a cargu de Mari Carmen Santos y Luis Ángel Fernández, del GF Prau Llerón. Fadráse entrega de los diplomes del cursu d’echaores y del Gallardón Fini Suárez. Darréu entamen les primeres actividaes musicales con L’Entamu, nel escenariu del Parque Xovellanos, onde actuarán la Banda Gaites Villa de Mieres y les agrupaciones llocales L’Artusu, Prau Llerón y Ruxidera. A les once la música siguirá cola actuación d’Herbamora y los gallegos Xurxo Fernandes & Pan. Sen. Fron. 

La sidre sedrá coprotagonista de toles actividaes, con repartu de sidre echao o de pipa demientres los tres díes que dura la folixa.

El sábadu 5 la programación entama a les 12h con xuegos pa la reciella a cargu de Guardianes del Planeta. Mentanto, L’Artusu, Ruxidera, Prau Llerón y la Banda de Música de Mieres van facer un pasucais pela villa. La Tardi en Danza, na que van tocar la bandina L’Andecha Turcipié y 6 Riales, entama a les ocho. Dempués de más xuegos pa la reciella con Xuegos de la Pumarada y de la Xuntanza de Sidre, los conciertos entamen a les 22h cola vuelta a los escenarios del grupu de folk-rock Skanda col acompangamientu de la Banda Sinfónica del Atenéu Musical de Mieres y la Banda de Gaites Villa de Mieres. Darréu Guieldu va presentar el so discu recién asoleyáu Memories de Deva.

La Folixa na Primavera de Mieres fina’l domingu 6 colos Cancios de Chigre na Plaza Requexu y la cai Jerónimo Ibrán, el Vermú Folixa Underground con Fañagüeta DJ na plaza La Pasera y  una representación de teatru de cai nel Parque Xovellanos. Toles actividaes son de baldre y hai serviciu de buses curuxa ente delles poblaciones del conceyu.

Susana Sela