La Plataforma Solidaria Asturies con Palestina entamó ayeri una actividá poético-musical nel paséu de Begoña: ‘Un abrazu d’humanidá al pueblu palestín’
“Con lluna en menguante —que ye afayadiza pa la llantadera, ¿non?—, coles mimoses en flor anunciando primaveres, y al otru día de l’alcordanza de don Antonio Machado, con un tiempu soleyeru acompañando…” Con eses pallabres, y acompañada tamién por Fátima y Miguel al saxo, abría la teatrista Pili Hevia’l recital poéticu col que se mandaba un mensaxe d’esperanza al pueblu palestín y desixíase nuevamente’l fin del xenocidiu en Palestina, el fin del comerciu d’armes y de les relaciones con Israel. De siguío tuvo llugar una emotiva llectura de poemes de Tawfiq Az-Zayyad, Heba Abu Nada, Rafeef Ziadah, Refaat Alareer, Mahmud Darwish, Luís Alfonso Iglesias, Suheir Hammad, Samih al Qasim, Ahlam Bsharat, Naomi Shihab Nye, Najwan Darwish, Fadwa Tuqan, Lluís Llach, Yasser Jamil Fayad, Saray Blanco y Miguel Hernández. 76 años d’esterminiu nun pudieron acabar cola poesía de los palestinos, magar a los munchos poetes asesinaos. “Güei la cosa va de poesía. Cuntamos lo mesmo de denuncia, de la inhumanidá del sionismu criminal, de la so capacidá destructora, al traviés de versos”, díxose na intervención, apuntando que, na traducción, piérdese siempres parte de la esencia d’esos poemes. Pa rematar l’actu, recordáronse los actos de la selmana: siguen les esposiciones de semeyes, de Daniela Cohen nel Centru Cultural de Mieres y de Mauricio Morales na Universidá d’Uviéu. Esti miércoles 26 preséntase l’informe d’Amnistía: “Ye como si fuéramos seres infrahumanos”, nel EASMU pela mañana, y na Universidá d’Uviéu pela tarde a les 6, con Carlos de les Heras y col catedráticu Miguel Presno. El xueves 27 ye’l 49 ’aniversariu de la creación de la RASD, y va haber recepción nel Antiguu Institutu de Xixón a les 13:30. Pela so parte, la plataforma Uniovi por Palestina presentó recursu contenciosu-alministrativu contra la decisión de caltener el proyeutu TICHE, belicista y de complicidá col sionismu israelín. Esti mesmu miércoles vuelven convocase concentraciones en tolos campus universitarios a les 12 (menos n’El Cristo, que ye a les 12:30, y en Psicoloxía, que ye a les 11:50).
NUN VAMOS COLAR
Tawfiq Az-Zayyad
Equí sobro los vuesos pechos persistimos,
como una muria,
esfamiaos,
coritos,
prevocadores,
declamando poemes.
Somos los guardianes de la solombra,
de les naranxales y los olivos,
semamos les idegues como’l lleldu na masa…
cuando tengamos sede
vamos estrumir piedres, y vamos comer tierra
cuando tengamos fame,
PERO NUN VAMOS COLAR
equí tenemos un pasáu,
un presente
equí ta’l nuesu futuru».
This work is licensed under a Creative Commons Attribution 4.0 International License.
