Cualquier nueche en Xixón hai sitiu pa que duerman 10.982 turistes -cuntando a ún por cama-, sumando les 4.642 places d’hotel y les 6.340 contabilizaes en pisos turísticos

Recientemente, nuna charra entamada por Andecha Astur en Cimavilla dicía’l presidente de l’Asociación de Vecinos que’l conceutu de ‘vivienda d’usu turísticu’ ye en sí un error “o ye pa vivir, y entós ye vivienda, o ye pal turismu, y entós nun lo ye”. Sicasí, 2.630 inmuebles xixoneses t ienen llegalmente esi estatus d’oxímoron, que los incapacita como llugar de residencia y que, al empar, constitúi una competencia deslleal dafechu pa los negocios hoteleros. Xixón ye una de les 25 ciudades con mayor volume de places turístiques del estáu y tamién una de les diez nes que’l númberu de places en viviendes d’usu turísticu supera’l de les ufiertaes por hoteles. El porcentaxe d’estes ‘viviendes’ medró un 17,5% respecto a la media del añu anterior, algamando les 6.340 disponibles, cuasique’l duple qu’Uviéu, mentanto que les places n’hoteles de la ciudá nun pasen de les 4.642 nel 2024. Ello ensin cuntar cola gran cantidá de pisos turísticos al maxe de lo llegal que nun se contabilicen nenyures. L’informe del que s’estraen estos datos ellaboráronlu los técnicos de Exceltur, de magar el cruce de rexistros del Institutu Nacional d’Estadística (INE) y los llistaos d’ufiertes accesibles a través de la ferramienta AirDNA.

Susana Sela

This work is licensed under a Creative Commons Attribution 4.0 International License.