Los docentes asturianos menacien cola fuelga si nun s’atienden les sos vindicaciones, ente les que destaca la equiparación salarial con otres autonomíes, l’amenorgamientu de carga burocrática de los centros y l’aumentu de plantiyes

Los centros escolares asturianos tán sobrepasaos, y los sos profesores tamién. Demasiada carga llectiva, a la que se-y suma la interminable burocracia, ratios esaxeraos d’escolinos, incrementu de medies xornaes y hores de formación ensin computar como llaborales, pente otres cuestiones, agravaes pol fechu de cobrar menos qu’otros profesionales del restu del estáu.

Asina que, cola voz unánime de los sos cinco sindicatos representaos na Xunta de Personal Docente non Universitariu –CC OO, UGT, ANPE, CSIF y SUATEA–  realizaron un decálogu que recueye les sos demandes, anunciando concentraciones nos recreos dende güei mesmu, pa dir alzando el nivel de l’amenaza hasta la fuelga xeneral si’l Principáu nun les atiende.

Apiora la situación el preslle en falsu del conflictu n’ochobre, cuando nun se yos reconoció más qu’un incrementu del dies d’asuntos propios -que siguen siendo menos que los de los demás funcionarios- y se dio a entender que “namás queríen trabayar menos”.

Decálogu “pola meyora de la enseñanza pública”

Nuevu alcuerdu de plantiyes, con medría de personal y baxada de les ratios.

Equiparación salarial col restu d’autonomíes.

Amenorgamientu de la carga burocrática de los centros.

Amenorgamientu de la carga lectiva al cuerpu de maestros.

Amenorgamientu voluntariu de la xornada lectiva al profesoráu mayor de 55 años.

Equiparación salarial de el profesores técnicos de FP al cuerpu de Secundaria.

Negociación de la nueva rede autonómica d’escueles infantiles, pública y ensin concertación.

Evaluación rigorosa del programa “FALE”.

Inclusión de la formación permanente del profesoráu nel horariu lectivu.

Dotar a los centros de los recursos necesarios por que sían espacios seguros y saludables.

Alberto Rodríguez