El macabru recuentu d’asesinatos blincó esti mes dende les 29 a les 40 víctimes, ochu al mes dende qu’entamó l’añu, una ca menos de tres díes demientres tol mes de mayu
Nuevamente, comu ca caberu miércoles de mes, los representantes de dellos coleutivos aconceyaron na Gota Llechi a visibilizar cola so presencia les muertes de muyeres a manes d’homes. Nesta ocasión correspondió lleer el comunicáu a una representante d’Equo, que llanzó al altu la lleva la entruga que munches veces mos facemos ¿Por qué homes sanos, fios d’ esta sociedá, asesinen a les sos compañeres, amantes, amigues, moces o muyeres. A vegaes incluso a la so reciella?”.
La rempuesta, continuó, ta na educación competitiva ya individualista que disprecia la collaboración y que pon perriba los actos y valores consideraos “masculinos” dexando comu de menor orde a los “femeninos”, subordinando asina les muyeres a los homes y dándo-yos pie a considerales de la so propiedá.
Aparte l’orixe del problema, urxe alcontrar una fin al mesmu y ta nidio, viendo la progresión de los asesinatos mes a mes, que por agora nun se ta faciendo abondo p’aparar esta llácara. Poro, Andecha Ástur, Anticapitalistes, Dar de mamar, Asociación de Pensionistes de Xixón, Feminismu en Llucha del CSI, la plataforma del serviciu d’ayuda a domiciliu -SAD-, Podemos y Verdes-Equo continuarán llamando a aconceyase los prósimos miércoles caberu de mes.
Susana Sela
This work is licensed under a Creative Commons Attribution 4.0 International License.
