Fasta agora nun cobraben dala indemnización porque nun coticen res a la Seguridá Social polos sos salarios, que multipliquen fasta por cincu’l SMI
En xunetu de 2019 el Grupu Parlamentariu Socialista propunxo incorporar al reglamentu de la Xunta Xeneral la posibilidá de conceder una indemnización pa los diputaos al dexar el so escañu, pesi a nun cotizar a la Seguridá Social y, poro, nun tener drechu a cobrar paru al dexala. Naquel momentu Podemos y VOX votaron en contra de la midía, siendo la entós vocera de la formación morá, Lorena Gil, una de les más crítiques, por ser una midía nidiamente contraria a les teoríes plantegaes dende’l principiu pol so partíu.
Podemos descuelgase agora y los sos parllamentarios xúbense felices al carru de cobrar más, formando parte de l’amplia mayoría que va aprebar el nuevu articuláu.
Ello va aprebase previsiblemente nel postrer plenu de la llexislatura, xusto a tiempu pa que cobren los cargos salientes nes prósimes elleiciones, xuntu col restu de la reforma del Reglamentu de la Cámara, los díes 28 y 29 de marzu. De magar entós los diputaos autonómicos van tener drechu al cobru d’una “indemnización de transición” cuando cesen nel cargu, auque nel reglamentu nun se detalla l’algame d’esa indemnización.
Redaición InfoAsturies
This work is licensed under a Creative Commons Attribution 4.0 International License.
