L’informe “Calidá del aire y salú n’Asturies, informes epidemiolóxicos” amuesa la relación pente la contaminación y los ellevaos ingresos n’hospitales

Vien d’espublizase na páxina d’Astursalud un informe que confirma les denuncies que ciudadanos y ecoloxistes lleven años faciendo sobre les consecuencies de la contaminación na salú de los asturianos, prebando científicamente el so fuerte impautu tantu n’enfermedaes cróniques comu n’ingresos hospitalarios.

Calidá del aire y salú n’Asturies, informes epidemiolóxicos” recueye los efeutos na salú humana de cuatro contaminantes, midíos pola rede d’estaciones de calidá del aire Principado lleva realizando estudiose: SO2, NO2, O3 y PM10. Les conclusiones apunten a qu’estos compuestos tienen relación direuta col númberu d’ingresos hospitalarios. En concreto, son seyes les enfermedaes respiratories y siete les circulatories cuyu apioramientu ta comprebadamente venceyáu al xorrecimientu de la polución.

Les qu’afeuten al aparatu respiratoriu son la infeición respiratoria aguda, neumonía, bronquitis y bronquiolitis, bronquitis non especificá y bronquiectasia, enfermedá pulmonar ostructiva crónica y asma. Les que dañen el coral y la circulación son l’infartu agudu de miocardiu y anxina, insuficiencia cardiaca, trestornos de condución y disritmies cardiaques, hemorraxa celebral, estenosis y oclusión celebral y enfermedá celebral mal definio.

Los efeutos de la contaminación sobro la salú de los asturianos lleven demostrándose pola comunidá científica dende’l primer informe al respeutu, nel añu 2.016, ensin que dende entós se fixere más que crear normatives y planes que s’incumplen sistemáticamente. Empreses comu Arcelor continúen contaminando con total impunidá, cola connivencia de tolos organismos oficiales; nun hai una correcha xixilancia de la calidá del aire, nun hai control sobre les empreses, falten ispeutores mediuambientales… pero sobre tou falta enfotu.
Per otru lláu, a nueve meses de finar el plazu pal cumplimientu del plan específicu de llucha contra la contaminación a curtiu plazu na zona Oeste de Xixón, que contemplaba 25 midies ya una inversión de cuasi diez millones d’euros, non solo nun se punxo en marcha, sinón que se ta plantegando la istalación d’una planta de pirólisis qu’agravaría el problema. 

Alberto Rodríguez

This work is licensed under a Creative Commons Attribution 4.0 International License.