El paru sube’n xineru más que’n dengun otru territoriu l’Estáu. Podemos camudar “xineru” nesta frase por cualisquier mes y cuasi de xuro valdría lo mesmo
Perdiéronse esti caberu mes otros 4.382 cotizantes, al tiempu que sumaron 2.342 persones a la cola’l paru (los dos mil restantes nun sabemos si renunciaron a apuntase al SEPEPA, algamaron la edá de xubilación ensin conseguir trabayar o a cencielles colaron d’Asturies).
La cuesta de xineru siempres ye pindia, pero esti añu a la finalización masiva de contratos tres de la (probe) campaña navidiega súmase a la descomanada subida de precios y la incertidume económica xorreciente.
Esti xineru robláronse un 26’5% menos de contratos que’l xineru pasáu, de los que un 67% por cientu son temporales y cuasique la metá de los que son indefinios son a tiempu parcial.
Finalmente, el númberu de persones beneficiaries de prestaciones por desemplegu sigui al alza, algamando les 33.158, de les que la mayoría (el 51% del total) cobra una prestación asistencial d’unos 463 euros al mes.
Redaición InfoAsturies
This work is licensed under a Creative Commons Attribution 4.0 International License.
