Un vascu espera de media 71 díes pa ser operáu, un gallegu 77 y un asturianu 92. El tan denostáu serviciu públicu de salú madrileñu tien una demora de 73 díes, 22 menos que na emponderá sanidá asturiana. Esta desemeyanza de plazos rescampla ante los datos de gastu sanitariu por persona, el d’Asturies, el mayor del estáu, 1.938 euros por habitante. El de Madrid, el menor d’España: 1.213 euros per cápita.

L’andanciu vieno a apiorar unos márxenes ya inaceutables, pasando de los 83 díes de demora va dos años a los 92 actuales de media. Si la operación ye de neurociruxía, el plazu medra a 197 díes de media, más de mediu añu, en traumatoloxía son 149 ya en ciruxía masilofacial 141. Una ciruxía vascular entarda 125 díes.

En total son 20.100 los asturianos tan pendientes d’una operación, depués de ser quien a travesar l’abegosu camín al traviés de cites telefóniques, mélicos xeneralistes escasos y saturaos, especialistes a los que s’aporta depués de meses d’espera y prebes que se retrasen al infinitu. Un enfermu entarda polo xeneral cuasi un añu ente qu’acude al serviciu mélicu de salú y qu’entra na llista d’espera pa ser operáu, a lo qu’hai que sumar otros tres meses anantes de ser operáu.