El Grupu Folclóricu y d’investigación etnográfica El Ventolín recupera, con esta Selmana dedicada a la música y cultura del país, les sos actividaes presenciales tres del andanciu
L’eventu entamará’l día 18 d’abril a les 20.00 hores cola inaguración nel Auditoriu polesu, na que tendrá llugar la intervención del presidente d’El Ventolín y de la conceyala de Cultura y l’actuación de Pandereteres de Fitoria, que’l día de los Güevos Pintos ufrirán otra actuación tres de la bendición na Plaza Conceyu. Tamién participarán nel tradicional desfile que se cellebrará a les 17.00 hores peles cais de la Pola.
El día 20 representaráse una obra de teatru costumista na sala principal del Auditoriu a cargu’l Grupu de Teatru de Carbayín, que presentará la obra “Ya somos democráticos” de José Ramón Oliva. El día 21 cellebraráse’l conciertu “Cantares de y pa neños”, con Fernando Valle Roso y Silvia Moreno.
El día 22, Paul Balmori y Rigu Suárez presentarán el so discu “El cantar del Simpatías”, basáu nel repertoriu tradicional de Ribeseya y la memoria de sus informantes, ya’l I Alcuentru d’Escueles de Música Tradicional en la Pola pondrá’l puntu final a esta selmana el día 23.
Redaición InfoAsturies
This work is licensed under a Creative Commons Attribution 4.0 International License.
