CSI y CCOO caltienen los paros convocaos n’Arcelor pol bloquéu del contratu relevu, la precarización del emplegu y el retayu de pesonal, que podría rondar el millar de trabayadores, venceyáu al llamáu plan de “descarbonización”

Los sindicatos mayoritarios, UXT, USO y Aciaa desvencéyense de les movilizaciones al considerar abondo’l compromisu de la empresa de garantizar la salida de los trabayadores nacíos en 1960 y 1961 afeutaos pol bloquéu del contratu relevu y garantizando la xubía salarial recoyía nel conveniu.  CC OO y CSI consideren esta rempuesta insuficiente pa los problemes de los trabayadores y amás desconfien del so cumplimientu, polo que convocaron dos  asamblees en Xixón y Avilés nes que s’aprebó por unanimidá siguir coles protestes.  Denuncien amás qu’hai emportantes desemeyances pente la versión de la propuesta de la empresa que tan comunicando los sindicatos mayoritarios y la real que recibieron de la empresa.

Magar el sofitu a les movilizaciones foi absolutu na asamblea de la factoría d’Avilés, onde hubo 218 votos en contra de les propuestes de la empresa y nengún a favor, na de Xixón foise un pasu más allá, yá que mientres 150 abogaron pola continuidá de los paros -como n’Avilés- tamién s’entamen a sentir voces que reclamen alzar el tonu de les protestes, plantegando una fuelga indefinida hasta que se solucione’l conflictu. Ayer martes empecipiáronse, poro, les movilizaciones  con paros dende les 10 a les 18 hores, que van siguir los díes 11, 14, 17 y 21 de febreru y que se van alzar el día 23 a 16 hores -de 6 a 22 hores- pa rematar el 28 con una fuelga de 24 hores.

This work is licensed under a Creative Commons Attribution 4.0 International License.