La Federación Asturiana de Llucha da un pasu decisivu pal caltenimientu del valtu al homologar el títulu de monitor nesta disciplina

El Poliesportivu Manuel Arboleya, en Santuyano, conceyu Bimenes, recueye esti domingu 5 de Setiembre un acontecimientu hestóricu nel ámbetu esportivu, que representa un emportante pasu alantre pa la recuperación de la llucha tradicional asturiana, el valtu. Por primer vegada van homologase les titulaciones oficiales de monitor nesta práutica,  a les que pueden optar técnicos federaos y el valtu sedrá  presentaáu énte’l públicu xeneral baxo l’amparu de la Federación Asturiana de llucha.

Amás, de magar les doce del meudíe va tener llugar una esibición acompangada d’una presentación de les llinies y oxetivos pa esti deporte nos meses vinientes, incluyendo la so promoción y espardimientu al traviés d’eventos ya esibiciones, la formación pa esportistes, entrenaores y árbitros con titulación oficial de la Federación de Llucha Olímpica y Disciplines Asociaes del Principáu d’Asturies o’l fomentu de la participación de los nuestros deportistes en torneos nacionales y internacionales de lluches autóctones como’l Festival Intercélticu d’An Orient. Como midía pa favorecer el so espardimientu y garantizar la so continuidá, proponse la práutica del valtu nos colexos asturianos comu actividá estraescolar y al traviés de xunidaes didáutiques.

El Conceyu Bimenes informa de que l’oxetivu final ye convertir el valtu nuna modalidá federativa con llicencia propia y que se la reconoza na Federación Española de Llucha asina como nel Conseyu Superior d’esportes.

La práutica del valtu, enforma amenorgada nes caberes décades, ta recoyida n’Asturies comu esporte popular dende los tiempos d’Estrabón, dedicando-y tamién delles pallabres Xovellanos na so obra. Nesti esporte los lluchadores gárrense pasando’l brazu drechu pel costazu zorgu’l contrariu y la manzorga  per baxo’l sobacu drechu, xuniendo dambes manes nel llombu d’ésti. Los lluchadores queden d’esta miente trabaos y tenten entós valtar al contrariu embaxo.

Llucía F. Marqués

This work is licensed under a Creative Commons Attribution 4.0 International License.