La Fiscalía Superior d’Asturies comunicó recientemente a la formación nacionaliega la so aceutación a investigar los fechos denunciaos por Andecha Astur, en concreto, dos posibles delitos de prevaricación y cofechu por ponese -a si mesmu en función del so cargu y al Palaciu Presidencial- al sirviciu d’una campaña promocional del diariu La Nueva España na que se rifaba -lliteralmente- una visita pela Sede del Gobiernu Asturianu guiada pol mesmísimu presidente d’Asturies.

P’Andecha Astur, convertir la figura’l Presidente nel oxetu-premiu d’un concursu promocional d’una empresa editorial privá, faciendo de guía sólo y esclusivamente pa dos grupos de lletores del diariu nuna visita al Palaciu Presidencial, ye un casu nidiu de prevaricación, al ponese a si mesmu y a un edificiu públicu d’usu oficial y restrinxíu a dimposición d’intereses privaos, promocionales y llucrativos.

L’otru delitu investigáu ye’l de cofechu, ello ye, si hubo interés por parte d’Adrián Barbón al tomar el determín d’ufrise pal sorteu, ello ye, si pa ello solicitó o recibió dádives a La Nueva España comu contraprestación a los favores, supuestamente illegales, qu’él facía a una empresa privá

Na denuncia que s’investiga acusase a Barbón de “pervertir la dinidá, les fonciones llegales y la categoría d’autoridá pública que tien el cargu de Presidente del Gobiernu asturianu, convirtiendo esta figura en mercancía comercial y oxetu promocional, sometiéndolu al porgüeyu d’una empresa privá”.

Llucía F. Marqués