La empresa Lezama Baltaderes-Los Álamos sollertó al Parque Empresarial Principáu de Asturies d’una llamada na qu’el exsecretariu del PSOE d’Avilés y exviceconseyeru d’Alministraciones Públiques del Principáu, Álvaro Álvarez, yos ufiertába l’axudicación d’un contratu en cuenta de una sostanciosa comisión
L’órganu de contratación presentó’l pasáu xueves una denuncia énte la estaya territorial d’Avilés de la Fiscalía, na que s’acusa al exviceconseyeru d’un presuntu delitu de prevaricación. Les dilixencies tán incoaes dende’l vienres y nestos momentos Álvaro Álvarez atópase so investigación pola presunta ufierta pa influyir nel procesu d’axudicación del contratu de la baltadera de les bateríes de coque d’Avilés, obra que salió a llicitación en 15,6 millones d’euros, solicitando a cambéu una comisión.
Aparentemente, Álvaro Álvarez contautó a finales del añu pasáu col xerente d’una de les empreses de la UTE qu’opta a la llicitación pa la citada obra, Lezama Baltaderes-Los Álamos, ufiertándo-yos la so ayuda pa consiguir l’axudicación del contratu en cuenta de un porcentaxe de la cantidá axudicada. Foi la mesma empresa la que, refugando la ufierta, punxo en conocencia de los fechos a la entidá Parque Empresarial Principáu d’Asturies (PEPA). La conversación caltenida pola empresa col exlíder de los socialistes avilesinos punxo darréu en marcha una investigación interna que desaguó na denuncia.
Nuria Prendes
This work is licensed under a Creative Commons Attribution 4.0 International License.
