La falta d’oficialidá ya’l ruin tratu dau pol Estatutu d’Autonomía a la llingua de los asturianos, asina comu la falta de competencies del gobiernu d’Asturies, dan argumentos a la formación d’ultra drecha españolista pa denunciar la Reforma del Reglamentu de la Xunta Xeneral

Más de mediu centenar de diputaos de VOX de toa España presentaron un recursu d’incostitucionalidá contra la Reforma del Reglamentu de la Xunta Xeneral, aprebá pol Plenu de la Cámara con fecha 1 de xunetu de 2020, con mayoría por 27 votos a favor y 13 en contra. Los recurrentes desllexitimicen con ello al gobiernu asturianu na toma de decisiones qu’afeuten direuta y puramente a Asturies, demostrando una vegada más la so fonda asturfobia y poniendo la decisión en manes del Estáu español.

El Tribunal Constitucional toma’l testigu y alcordó apocayá almitir la querella a trámite, treslladando la demanda y documentos presentaos  al Congresu de los Diputaos, al Senáu, al Gobiernu y a la Xunta Xeneral y al Conseyu de Gobiernu del Principáu de Asturies, con cuenta de puedan personase nel procesu y formular los allegamientos qu’envaloren convenientes. Esto ye, l’Estáu Español almite la incompetencia del executivu asturianu pa decidir comu fala, abriendo la puerta a la prohibición del usu del asturianu per parte de diputaos, miembros del Conseyu de Gobiernu, cargos y emplegaos públicos y quien comparezan nel órganu autonómicu.

Nuria Prendes