Los díes 7 y 8 d’abril, la banda asturiana de fusión La Tarrancha empeciapia la so xira de conciertos fuera les nueses llendes con dos actuaciones en Palencia y Madrid

Llucía Fernández Marqués

Los direutos de La Tarrancha son reconocíos pol conceutu de música 100% bailladera. Llibre de purismos, nin de la necesidá de tener una etiqueta concreta para lo que se fai, son capaces de llevantar los pies del suelu a públicu de bien diversos perfiles.

En “Elefantes na cacía”, La Tarrancha presenta un discu ensin complexos, con más coqueteos coles distorsiones y los ritmos duros que n’anteriores trabayos, pero que nun-y faen perder la so esencia a base de ska entemecío con aires balcánicos, llatinos, tintes de música tradicional asturiana, guiños punks o metaleros nunos momentos… paro tamién al swing, al reggae, al rap n’otros… Vamos, pa tolos gustos, o pal públicu al que-y gusten munches coses, sobremanera baillar. Un pocu la esencia del títulu ye precisamente eso; faciendo referencia a parte d’una de les sos lletres, llévanos al tracamundiu y a imaxinanos unos elefantes caciplando ente la nuesa cacía nuna fiesta doméstica pero indomesticable dafechu. Daqué asemayao El Guateque de Blake Edwars, pero ensin Peter Sellers y nel contestu d’una Asturies Undeground totalmente abierta a influencies culturales esternes calteniendo, siempre presente’l sabor de lo autóctono. En “Elefantes na cacía”  vamos atopanos temes que falen del amor, de la fiesta, de la conciencia individual y colectivo, de llucha, d’allegría y de murnia; como la vida mesma, un cúmulu de toes eses coses que ye n’esencia de lo que tamos feches les persones.

El día 7 van faer la so primer parada en La Puerta Verde de Palencia, que colos años consiguió convertise nun espaciu alternativu de referencia. Los conciertos van empezar a les 22:00h. Nesta ocasión, comparten cartelu col rock rural de los palentinos Los Tavones, primer día de fiesta aseguráu.

La siguiente parada d’esta fin de selmana va ser salar Ego, en Alcalá d’Henares, Madrid, eso sí esta vez un pocu más ceo, con apertura de puertes a les 20:30h. La Tarrancha va tar acompañada d’una banda bien conocida na ciudá, Ajolote, que van ufiertar un espectáculu cargáu de funk, reggae y rock.

A lo llargo d’estos catorce o quince años, La Tarrancha tien asoleyao cinco discos en solitariu y participao en distintos discos, yá sían compartíos, recopilatorios o discos d’homenaxe a otros artistes, incluyéndose nellos temes inéditos o versiones.

La so música tien llicencia Creative Commons. Podemos descargar el so últimu discu “Elefantes na cacía” al traviés de Bandcamp. Los sos anteriores trabayos tán disponibles al traviés de la páxina de Jamendo.

This work is licensed under a Creative Commons Attribution 4.0 International License.