Cuasi la totalidá de los docentes qu’imparten llingua asturiana son interinos, predominen los contratos a media xornada ya itinerantes y abondes places queden ensin cubrir

Entama un nuevu cursu escolar y el profesoráu de Llingua Asturiana sigui careciendo otru añu más la precarización nel so puestu de trabayu. Cuasi la totalidá  ye profesoráu interino y na primera axudicación asígnáronse-y puestos a media xornada (85% de los totales) en munchos casos itinerantes. Esta tendencia a la precarización llaboral con contrataciones a media xornada ye constante nos caberos años:  69% en  2015 y 2016, 72% en 2017 y 82% en 2018.

Dende’l Sindicatu d’Ensiñantes Asturianos destaquen qu’esti empeoramientu “nun respuende a una merma na demanda d’esta materia, voluntaria per parte del alumnáu y los pas, sinón a criterios economicistes que primen l’aforru percima la calidá educativa y los derechos del alumnáu a escoyer y recibir llibremente estes ensiñances”. 

Munches de les places queden ermes y los escolinos queden ensin recibir clases d’asturianu demientres meses (8 istitutos el cursu pasáu) o incluso’l cursu completu (Zarréu -Degaña- onde l’alumnáu tuvo tol cursu pasáu ensin profesoráu), comu consecuencia de la esistencia de places a media xornada de Secundaria, sobre too aquelles más alloñaes del centru. Esti cursu deteutamos tamién resistencia a ampliar a xornada completa delles places que s’axudicaron como medies, magar que les sos necesidaes horaries son superiores. Irregularidaes y falta d’atención vienen cronificándose dende va unos cursos y van tener efectos esti: influir negativamente na escoyeta de l’asignatura.

Al alumnáu d’Educación Infantil (E.I.) nun se-y ufierta estes enseñances debío a la irregular forma d’actuar de la  Conseyería Educación: solo nel casu qu’al profesoráu de Primaria contratao-y sobre hores llectives nel horariu s’ufierta la posibilidá de que l’alumnáu d’E.I. les reciba. Esta forma d’actuar ye dafechu contraria a la Llei d’Usu y dada la masiva contratación de profesoráu de Primaria a media xornada ta nidio que nun hai nengún interés por atender a esta etapa educativa básica nel deprendimientu y sobrevivencia d’una llingua. D’ehí que’l númberu d’ecueles con Asturianu na Educación Infantil seya ínfimu y qu’haiga pas y mas a los que nun s’atiendan les sos demandes d’escolarización llingüística.

Ante esta situación ya’l panorama llingüísticu xeneral, el Secretariu de SUATEA declaraba que “el camín a la oficialidá qu’hai que dir andando preséntase enllenu bardos, les nueves conseyeres d’Educación y Planificación Llingüística puen cuntar con nosotros na sestaferia. Nós yá tenemos preparada la ferramienta: acabar coles medies xornaes y la precariedá; discriminación positiva na escoyeta voluntaria de l’asignatura, reconocimientu de la especialidá docente y concursu de tresllaos; formación del profesoráu; xeneralización de la ufierta en toles etapes educatives; y dotación presupuestaria”. 

Redaición InfoAsturies

This work is licensed under a Creative Commons Attribution 4.0 International License.