Pa torgar “ataques” de los perros pastores les normes son clares: respetalos, allonxase, continuar con calma’l camín y dexalos siguir col so llabor

Ca llugar tien les sos normes y ye preciso adentrase nelli conociéndoles y respetándoles. Sicasí, la inorancia urbanita de los que confunden el monte con un parque d’atraciones xenera tolos años situaciones pente cómiques y dañibles que dificulten asgaya la vida de la xente de los pueblos. Nun ye namás l’avezada falta d’hixene de dellos escursionistes, tracamundiar una caleya cola Gran Via pue dar llugar a comportamientos pocu afayaizos y a vegaes pelligrosos.

L’añu pasáu un turista baxaba del monte con un burru del ramal, llevando l’animal a la comisaría, alegando que “taba abandonáu, amarráu a un árbol”. Unos pas desixien “daños y perxuicios” pola costalada que llevare’l so rapacín por “culpa” d’una vaca que nun quiso tase quieta mentantu-y engolaben al so retueyu al llombu pa sacar una semeya. Los dueños de perros sueltos pel monte o pelos pueblos tienen de dir a recoyelos a la perrera ca pocu ya’l perimportantísimu llabor de los perros mastines vese davezu estorbáu pola inorancia de los que quieren rescatalu, tocalu, xugar con elli o sacase la semeya.

Poro, los pastores pidin que se pongan señales nes que s’indique que nun s’averen a ellos “nun tan abandonaos, nun son un xuguete, nun son un decoráu turísticu, son perros y tan trabayando”. Recuerden a los visitantes que’l mastín afita un perimetru de seguridá alrodiu del animal que curia y que lo fae lladrando p’avisar si t’averes más de la cuenta; nesi casu, caltener la calma y allonxase tranquilamente, dando un arrodiu d’unos 20 m, nun siguir averándose, nun glayar, non correr nin facer esparabanes: pal perru eses sedrán señales de pelligru. Si se va en bicicleta ye recomendable posase y facer esti tramu a pata y si se lleva perru, amárralu. Col envís de frenar les denuncies ridícules, los pastores informen de que los collares de pinchos defenden al perru de los bocaos de los llobos, nun son maltratu animal. Pa finar, seique paeza una obviedá, quien alcuentre un cabritu, un corderín, un cadiellu o perru adultu pel monte nun lu pue llevar pa casa: costitúi un delitu de robu, por mui gayasperu y guapu que seya l’animal.

Llucía F. Marqués

This work is licensed under a Creative Commons Attribution 4.0 International License.