Les situaciones de necesidá nel conceyu medraron más del 91% nos caberos nueve años y pal cursu qu’entra cerca de 3.000 rapacinos xixoneses dependerán de les beques comedor pa xintar
Echar un gabitu a la conciliación llaboral, garantizar una xinta diaria a los escolinos de families en dificultaes económiques -el 21% de la población asturiana- y atender a la reciella con “carencies d’atención familiar”: eses son les funciones que, demientres el cursu, cubren los comedores escolares del conceyu al traviés del programa municipal de beques.
Los beneficiarios, 2.794 escolinos d’infantil y primaria, sumen un 91’6% más que nel añu 2.010 y pal añu qu’entra hai reservada una partida de 2’3 millones d’euros que se repartirá pente los más de 3.000 solicitantes, lo que duplica ampliamente les 1.458 concedies va nueve años. 181 menores recibieron tamién beca d’Atención Temprana, qu’atiende a la reciella de magar les 7:30 la mañá, dándoyos l’almuerzu. Seique nun hai cifra esauta, munchos d’ellos siguin xintando en colexu dientru’l programa de campamentos “11×12”
Les condiciones económiques pa recibir una beca comedor incluin que los ingresos añales por miembru de la familia seyan inferiores a los 3.000 euros -unos 250 al mes- o que dependan dafechu del salariu social y aides municipales. No que cinca al baremu social, puntúa que los proxenitores ten desemplegaos o que se trate d’acoyimientu familiar o situación de desproteición.
Por agora el serviciu de comedor suspéndese al aportar a la ensiñanza secundaria, seique yeren dellos partíos los que lo contemplaben nos sos programes, polo que’n teoría tendría de tar trabayándose nello pa los cursos vinientes.
Nuria Prendes
This work is licensed under a Creative Commons Attribution 4.0 International License.
