El fin de les hores estres supondría más de 4.500 nuevos contratos n’Asturies
La nueva midía de fichar a les hores d’entrada y salida da una imaxen de llegalidá a les empreses pero nun hai res qu’impida fichar la salida y siguir trabayando
Los empresarios asturianos aforren alrodiu de 70.143 hores a la selmana perriba les xornaes llegales ensin dala triba de compensación, nin económica nin con descansos en vacaciones. Pa cubrir eses hores estres, calcula’ reciente informe de CCOO, sedría necesario contratar más de 1.700 persones.
La recien afitada llei que obliga a fichar a la entrada y la salida persigue controlar les hores estra y forciar asina a los empresarios a pagar estos escesos de xornada qu’agora mesmo se faen de baldre, cuasi’l 40% de les hores estres.
Diendo un pasu más allá nel tema les hores estres, que se paguen nun ye abondo, n’opinión de Llucía Fernández, candidata por Andecha Astur, “dende un puntu de vista d’economía social, toes eses hores estres que se faen podríen reconvertise, direutamente, en más de 4.500 nueves altes na seguridá social“. Esto implicaría una inmediata baxada de la tasa de paru d’un 6%, amás d’evitar la sobrecarga llaboral de los actuales contrataos.
Seique lo considera una midía positiva, que polo menos visibiliza’l problema, tampocu considera que’l rexistru de los horarios d’entrada y salida vaiga ser determinante nel control de les hores estres “en delles empreses faese a man, roblando un papel que puede prestase a toa triba de falsificaciones, pero ye qu’utilizar una máquina tampocu ye determinante, res torga que se fiche la salida y se siga trabayando”.
Nuria Prendes
This work is licensed under a Creative Commons Attribution 4.0 International License.
