En llugar de frenar la sangría poblacional y traer de vuelta a los asturianos emigraos forciosamente, la banca propón comu solución traer estranxeros, baxar les pensiones y allargar la edá llaboral

L’esfarrapamientu del texíu socioeconómicu asturianu y la continua emigración de la mocedá lleven a una situación na que’l 42% de los conceyos asturianos rexistra más xubilaos que trabayaores, con namás dos n’activu por caún retiráu, cuestión que s’agrava al incluyir na cuenta a toles pensiones: como media, Asturies tien 1’3  cotizantes por ca pensionista.

BBVA Research, sociedá que lleva años desendolcando estudios sobro la relación cotizantes/xubilaos y les sos consecuencies económiques, indica que pa caltener la relación actual pente la pensión media y salariu mediu tendría que traese a Asturies miles de trabayaores foriatos, supónse que por ser menos conflictivos que los asturianos y dar más posibilidaes de contratos precarios. El FMI apúntase a esa solución, añadiendo que habría d’amenorgase les pensiones, privatizales, crear impuestos, allargar la vida llaboral y baxar los salarios, amás de “incrementar la proporción de persones que trabayen”. Pero la cuestión nun ye esa: n’Asturies nun hai déficit de trabayaores, hai déficit de trabayu.

Siendo la sétima fastera d’Europa cola población más avieyao -con una edá media de cuasi 50 años perriba de cualisquier otra del estáu-, Asturies tien la menor tasa de población activa ( 50’27%). Asina alcontrámonos con que’l 20% del PIB d’Asturies correspuende a los pensionistes, cifra que va en rápida progresión. Nos meyores casos hai cuasi dos trabayaores por xubiláu, con 33 conceyos con prevalencia de pensionistes y otros 23 nos que malpenes s’algama l’ún por ún. Ibias ye’l conceyu con menor ratiu, con namás un 0’38%  trabayaores por xubiláu, siguíu de Riosa (0,45) y Quirós (0,54).

El problema nun ta namás na baxa cifra de cotizantes, sinon nel previu marafundiu del fondu de pensiones qu’obliga a depender de los trabayaores n’activu pa caltener la paga de los que ya cotizaron y na precarización del emplegu que desploma les cotizaciones.

Llucía F. Marqués

This work is licensed under a Creative Commons Attribution 4.0 International License.