Dende’l miércoles pasáu continúen aportando millones de piqueños crustáceos a les playes del Ocidente asturianu, de Tapia al Cabu Peñes. Seique la playa más afeutada ye la de Xagó, tamién aporten por millones a l’Aguilar, L.luarca, Tapia de Casariegu, el playón de Bayas y San Xuan de Nieva

Los animales, anfípodos hipéridos, que son muérganismos asemeyaos a la esguila pero con una tiesta mayor, formen ya una capa qu’algama en dalgunos puntos más d’un cm de grosor. Aporten vivos a les sableres, pero al pocu muerren desidrataos.

Foron los ecoloxistes los que dieron la voz d’alarma en cuantes qu’entamó la invasión, pero a díe d’ayeri  la Conseyería d’Infracadarmes, Agroganadería y recursos autóutonos nun tomare entá midies y la única recoyida de muestres de la que se tien conocencia yera la fecha a motu propiu pol personal de Cepesma (Coordinadora pal Estudiu y Proteición de les Especies Mariñes), que recoyeron amueses en delles zones, gracies a les que pudieron descartar la muerte por contaminación química. Cenciellamente, declararon dende l’organismu, los animales nun son quien a tornar al agua una y bones la marea los posa nel sable.

Amás de les descomanaes concentraciones na sable, hai una marea d’ellos entá vivos y nel agua, avanzando camín de Galicia. Seique la presencia d’estos anfípodos nun tien porque tener dengún impautu negativu nel ecosistema asturianu, evidencien la esistencia d’un problema: paez ser que foi l’alteración térmica de les corrientes mariñes lo qu’ocasionó esti socedíu, que ya se vien produciendo nos caberos años na costa asturiana – seique en proporciones munchísimo menores- ensin que se-y diere mayor emportancia.

Nuria Prendes

This work is licensed under a Creative Commons Attribution 4.0 International License.