Decenes de gaiteros y cientos de persones despidieron en Soto Ribera a Aurelio Argel, cronista de la música’l país, al son de la Marcha d’Antón el Neñu
Nun podía ser d’otra mena, José Aurelio García Argel coló al son de la música. Consideráu un de los mayores espertos d’Asturies en música folk y celta, conocíu por dar puxu ya esparder el padrimoniu musical asturianu al traviés de los medios de comunicación, tanto na so vertiente más tradicional como nes anovaciones más recientes, collaborador de la Fundación Belenos-responsable de la estaya “Arcu Atlánticu” en bien de númberos de la revista “Asturies, memoria encesa d’un país”- y direutor del programa de Radio Asturies “Música pa raptar princeses”, Aurelio dexa un vacíu bien grande y difícil d’enllenar, tanto no personal comu no cultural, nun intre en qu’Asturies ta necesitada de munchos comu elli.
Al funeral, que tuvo llugar en Soto Ribera, averáronse decenes de gaiteros, avisaos de qu’Aurelio pidiera ser despidíu cola música de la “Marcha d’Antón el neñu”. Pente los músicos que foron a rendi-y reconocimientu tuvieron dalgunos de los gaiteros más conocíos del panorama musical asturianu, coscientes de lo que’l país debe a esti home. Nun faltaron les gaites de José Manuel y Javier Tejedor, Vicente Prado “El Pravianu”, Iñaki Santianes, Pedro Pangua, Berto Varillas, ya’l tambor d’Eva Tejedor.
Bon viaxe a Ávalon; ellí mos volverémos a ver.
Llucía F. Marqués
This work is licensed under a Creative Commons Attribution 4.0 International License.
