La Universidá d’Uviéu entamó güei en Xixón la so feria añal d’inserción llaboral, en principiu dirixida a los estudiantes y recién titulaos pero na que participen desemplegaos de toles edaes, siempres que tengan una titulación qu’ufrir a les empreses
Asturies cuenta con una población altamente formada y un nivel mediu d’estudios superior a la del estáu español. Sicasí, un escasu 25% de los titulaos na Universidá d’Uviéu consiguen alcontrar trabayu de la so especialidá dientro d’Asturies.
Esti Foru busca poner en contautu a los estudiantes y titulaos coles empreses, de manera qu’estes puedan conocer de manera direuta a les persones que podríen meyorar la so plantiya y estos sepan de primer man que ye lo que busquen los emplegaores nel mercáu llaboral.
Nel 17 Foru d’Emplegu alcuéntrase un puntu de revisión de curriculums y otru pa poner al díe los perfiles linkedin, información pa emprendeores, talleres y charres, ufiertes de formación y sobre tou munches empreses.
Más de setenta empreses y entidaes busquen los sos futuros trabayaores pente los cientos d’asistentes a esta Feria d’Emplegu, que tien l’envís principal de facilitar el contautu direutu pente posibles emplegaores y emplegaos.
La Feria continuará mañana con más charres y talleres nel recintu ferial Luis Adaro, pente les diez y las siete la tardi.
Redaición InfoAsturies
This work is licensed under a Creative Commons Attribution 4.0 International License.
