• Portada
  • >
  • Ensi​n categoría
  • >
  • Entrevistamos a Fernán Morán, presidente de la Lliga Celta d’Asturies y un de los más implicaos na defensa del Chao Samartín y del padrimoniu hestóricu asturianu en xeneral

Entrevistamos a Fernán Morán, presidente de la Lliga Celta d’Asturies y un de los más implicaos na defensa del Chao Samartín y del padrimoniu hestóricu asturianu en xeneral

  • 11 Marzu, 2018

 

– Anantes de falar del nuevu plan pal Chao Samartín y les protestes interpuestes contra elli, ¿podríes informanos un puquiñín de la importancia d’esti conxuntu arquiteutónicu?

Bonu, la importancia del castru Chao Samartín anicia en que ye un de los castros asturianos que tien rexistros más antiguos. Sábese que los primeros pobladores del castru asítiense alrodiu de la Edá de Bronce tardíu, alredor del 800 a.C.; sigue mientres la Edá del Fierro, intre nel que van modificase les defenses; depués cola invasión y ocupación romana conviértese nun centru de poder perimportante fasta’l sieglu II d.C., dómina na qu’esfarrapa’l castru un terremotu. Ye llóxico pensar que por cuenta de tantos sieglos d’ocupación en distintes dómines de l’hestoria asturiana, qu’esistan numberosos elementos arqueolóxicos nel xacimientu, tal que se comprobó nes anteriores escavaciones realizaes, qu’apurrieron información sustancial para la conocencia de l’hestoria del nuesu pueblu naquella dómina. Parte d’esti magníficu xacimientu arqueolóxicu ta por escavar, en concretu, y no que nos ocupa agora, un xacimientu de la Edá del Bronce y otru de la Edá del Fierro qu’apurriríen información d’incalculable valor para afondar na conocencia de la nuesa hestoria y la nuesa cultura.

– ¿Por qué la Lliga Celta d’Asturies se pon en contra de daqué que, aparentemente, beneficia a una pieza tan importante’l nuesu padrimoñu?

Como pasa con casi tol patrimoniu históricu-cultural d’Asturies, nun taba nes meyores condiciones, pero esistía la posibilidá de qu’ameyoraren les circustancies y pudiera escavase nun futuru prósimu col correspondiente llogru de la información contenida no xacimientos antes mentaos. La Lliga Celta d’Asturies opónse radicalmente al proyectu que s’aprobó apo-cayá para la realización d’unes obres nel xacimientu que consistiríen na realización d’un centru de visitantes xusto enriba de los xacimientos del castru entá por escavar y que son de vital importancia histórica pa Asturies. Pero nun acaba ende la cosa… Amás quieren usar formigón para realizar les obres colo que s’estrozaríen irremediablemente y ensin posibilidá de recupera-ción los dos xacimientos, unu de la Edá del Bronce y otru de la del Fierro cola perda de tola información que nos apurriría.

– ¿Esautamente, comu daña esti plan al conxuntu’l Chao?

Nun soi arqueólogu, pero falé con dalgunos d’ellos estos díes pa documentame y toos confirmáronme que’l proyectu ye una auténtica aberración y qu’estrozaríen lliteralmente los xacimientos ensin posibilidá de recuperación… una braera aberración vamos.

Paez como si hubiere una zuna especial en caltener unos elementos en detrimentu d’otros… ¿a qu’atribui vusté esti matiz?

Home ta claro ¿non? Hai unu enclín xeneralizáu a “romanizar” Asturies. Fai non más de trés décades tolos castros de Asturies yeren “romanos”, amás categóricamente, nun hubo más qu’escavar meyor y diéronse cuenta de que yá taben los ástures ende fai yá 3000 años… A esto hai que suma-y un desinterés cuasi absolutu del Gobiernu del Principáu d’Asturies que, dacuando, raya na indolencia, pa col nuesu patrimoniu cultural y hestóricu y yá tienes la rempuesta… penoso. Pero volviendo al casu que nos ocupa, a la Lliga Celta d’Asturies esmoleznos enforma como ye posible qu’un proyeutu que lliteralmente va destruyir dos xacimientos d’esta importancia llegó a aprobase… ¿ú el papel tuitivo qu’hai de tener el Gobiernu del Principáu d’Asturies col patrimoniu históricu-cultural d’Asturies tal que-y obliga la Llei?, ¿qué intereses y de qué naturaleza faen que los técnicos del Gobiernu del Principáu d’Asturies aprueben un proyectu d’esta naturaleza? A lo último son munchos les interrogantes y les incongruencies que tendríen de ser esclariaes y son munches les incompetencies que tendríen de ser depuraes, la primera que’l Conseyeru de Cultura, dimita, porque la so actuación en tou esto foi pésima, yá seya por incompetencia o por mentir nel plenu de la Xunta Xeneral del Principáu, como pudimos costatar últimamente nos medios.

 – ¿Qué triba de midies recomendaría pa la meyora del Chao?

En primer llugar la suspensión del presente proyeutu poles razones argumentaes enantes. De segundes, la revisión del proyeutu por téunicos cualificaos y oxetivos que realicen un proyeutu, si ye vidable, de forma que nun s’estrocen los xacimientos del llugar. Y d’últimes y non menos importante, que dimita’l Conseyeru de Cultura y dalgún qu’otru técnicu del Gobiernu del Principáu d’Asturies por incompetencia.

– En xeneral, ¿comu definiría la política del “Principado” no que cinca al padrimoñu asturianu?

Insatisfactoria.

-Tornando al tema del Chao, ¿La LLCA tien camentao entamar dalguna triba d’aición pa frenar esti atentáu?

Tamos faciendo, dientro de les nueses posibilidaes, tolo que ta na nuesa man. La primer aición foi intentar informar, denunciando tou esti despropósitu y apurriendo información del propiu proyeutu na que se reflexaba la otomía que quieren realizar. De tolos medios a los que se-yos unvió la información, namái un lo espublizó p: Infoasturies. Tamién punximos en contactu con dellos partíos políticos y dellos coleutivos y tamos entamando la formación d’una concentración para solicitar la suspensión d’esti proyeutu. A midida que avanzamos, van surdiendo nueves acciones, vamos ver lo que pasa nel próximu plenu de la Xunta Xeneral del Principáu d’Asturies, y dempués vamos mover ficha. Lo que puedo asegurate ye que nun vamos quedanos de brazos cruciaos viendo como estrocen dos xacimientos arqueolóxicos de vital importancia pa la conocencia de la hestoria, cultura ya identidá asturianes. Cenciellamente vamos faer tou cuanto tea al nuesu algame pa evitalo.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies