El “Principado” torna apostar pol turismu

  • 26 Outubro, 2017

El sector servicios, cientráu na hostelería y el turismu, sigue siendo pal “Principado” la meyor opción pa la salida de la crisis económica n’Asturies

Metanes les continues emisiones contaminantes que tornen l’aire asturiano n’un de los más peligrosos d’alendar d’Europa, con 13.000 hectárees de monte recién quemáu y depués d’un branu nel que la masificación turística xeneró problemes nos puntos más emblemáticos del país, cuntando con una población que destaca pola so preparación universitaria en tolos ámbetos y una tradición agrícola y ganadera de sieglos, el “Principado” sigue viendo’l turismu rural como única opción y sector fundamental para’l desendolque económicu.

Llueñe de faer un apueste pola recuperación de la economía tradicional, amestada a l’agricultura y la ganadería, sofitando estos sectores y buscando víes que permitan el meyor aprovechamientu de la riqueza asturiana o’l capital humanu que representen los miles de mozos universitarios que preferiríen nun tener qu’escoyer ente emigrar y trabayar de camareros, el director xeneral de Comerciu y Turismu, Julio González Zapico anuncia que’l “Principado” tornará potenciar en 2018 el turismu rural como principal sector de recuperación económica.

Nesti sen, precisó que va siguir la polémica campaña “Vuelve al Paraísu”, na que se van incluyir anuncios específicos de turismu rural, amás d’otres midíes de sofitu a la comercialización de los agospiamientos rurales, como l’encamientu d’escapaes al traviés de redes sociales, campañes en páxines ueb especializaes y la creación de nuevos soportes como les caxes regalu, ente otres.

Nun se mentó, sicasí, la proteición de los espacios naturales, l’arquitectura y l’identidá asturiana como elementos diferenciadores capaces d’atraer un turismu respetuosu y de calidá, contrapuestu al turismu de mases, nel que la so baxa rentabilidá económica acompanga polo xeneral al so altu impactu negativu.

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *