Del xueves 31 d’agostu al domingu 3 de setiembre Villaviciosa vivirá a ritmu de gaita, con abondes actividaes alrodiu de la música’l país ya’l so istrumentu estrella
L’espeutáculu “La nueche de la gaita”, na Plaza José Caveda y Nava, abrirá la programación d’un festival que na so doceava edición cuntará con 6 bandes de gaites. Darréu, Bufff Trio actuará nel pub El Trasgu, presllando’l primer díe con una jam-session.
El vienres sedrá’l primer díe de mercáu na plaza El Pelambre, de magar les cinco de la tardi, nuna xornada na qu’habrá muncho que deprender: taller d’ornamentación pa gaita asturiana nel Cientru Cultural Capistrano, a cargu de Balbino Menéndez, ya conciertu didáuticu d’Uilean Pipes (Gaita Irlandesa) a cargu de Borja Baragaño nel Teatru Riera. Pela nueche, tercera edición de la Nueche’n Danza, na que toos tais convidaos a danciar al ritmu de Cantaruxare, Los Gascones y Les Panderetes de Fitoria.
El sábadu fadremos doblete: Festival de Gaita de tardi y Fiesta de la Sidra pela mañana.
Un taller de fabricación de payueles y un alcuentru de luthiers d’instrumentos musicales tradicionales darán pasu, a les seis de la tardi, al platu fuerte del XII Festival de Bandes de Gaites del FIG, el pasucais coles bandes de, Navia, Uviéu, Moreda y Villaviciosa, con dos bandes gallegues como convidaes. El sábadu remátase con una nueche folk, colos grupos Texu, Felpeyu y La Tarrancha como protagonistes.
La cabera xornada del FIG entamará en dellos chigres de la villa con una sesión vermú con música en vivo de les bandes y bandines participantes, de les doce’l mediudíe fasta les tres de la tardi. El segundu Certame FIG de canción asturiana entamará a les cinco la tardi y cuntará cola actuación de Carlos y Daniel Velasco, Alicia Villanueva, Isaac Sierra y Rosario González, con Arturo Alonso “Turu” a la gaita. El VII Concursu de Gaiteros Solistes “Memorial José Huerta” presllará l’abondosu programa del Festival.
Llucía F. Marqués
This work is licensed under a Creative Commons Attribution 4.0 International License.
