Los cinco trabayaores despidíos de la estación d’ALSA llancen un comunicáu nel que despliquen los motivos de les sos movilizaciones y piden comprensión a los vecinos de Xixón y a toes aquelles persones a les que pudieren afeutar colos actos reivindicativos colos que protesten polos sos despidos
Los antiguos emplegaos de la empresa de tresporte, qu’aidaben nes maniobres d’entrada y salida de los autobúses pa qu’esta fore lo más rápida y segura, aseguren que ”realizábemos el nuesu trabayu a entera satisfaición de los usuarios y nun hai motivos pa los nuesos despidos, más allá de la intención del Grupu ALSA de ganar más dineru a base de precarizar l’emplegu y pagar menos pola llabor que realizábemos, ya escasamente retribuyía.
Nel comunicáu piden disculpes polos trastornos que pudieren acarretar los atascos xeneraos poles movilizaciones, al tiempu que pidin comprensión y solidaridá na so griesca por recuperar los sos emplegos, recordando a los ciudadanos qu’ellos son los primeros interesaos en que se normalice la situación na Estación del ALSA de Xixón, de la que culpen a la direición del Grupu ALSA . Dende’l primer intre solicitaron una negociación que solucionare’l conflictu, pero siguen esperando dalguna ufierta de readmisión.
Redaición InfoAsturies
This work is licensed under a Creative Commons Attribution 4.0 International License.
